საქართველოს ენერგეტიკის მინისტრის კახა კალაძისა და მისი ირანელი კოლეგის შეხვედრის დეტალებზე, ჟურნალისტებთან ირანის გაზის ექსპორტის კომპანიის დირექტორმა ალირეზა ქამელიმ ისაუბრა. მისი თქმით, საქართველო ირანიდან 200 მლნ. კუბური მეტრი გაზის იმპორტზე მოლაპარაკებებს აწარმოებს. ამის შესახებ ინფორმაციას ირანული მედია ავრცელებს.

„საქართველოს კერძო და სახელმწიფო სექტორი დაინტერესებულია, ირანისგან გაზი შეისყიდოს. მოლაპარაკებები მიმდინარეობს და იმედი გვაქვს, რომ შეთანხმებას მივაღწევთ “ - განაცხადა ქემელმა.

მისი თქმით, მოსალოდნელია, რომ გაზის ექსპორტი მომავალი ირანული წლიდან ანუ 21 მარტიდან დაიწყოს.

როგორც ქემელმა განაცხადა, პირველი კონტრაქტი 7 თვის ვადით გაფორმდება და სამომავლო თანამშრომლობისთვის საბაზისო იქნება.

კომპანიის აღმასრულებელმა დირექტორმა აღნიშნა, რომ „საქართველომ უნდა მიიღოს სომხეთში ბუნებრივი აირის ტრანზიტისთვის აუცილებელი ლიცენზიაც“.