"კარგია, რომ აფხაზეთი არ ჩავაბნელეთ" - ოკუპირებული რეგიონის მომარაგება რუსეთის გარეშეც შეიძლებოდა

პოლიტიკა - 18:19, 17 Feb, 2016

1477

ექსპერტი ენერგეტიკის საკითხებში ლევან ფავლენიშვილი დადებითად აფასებს საქართველოს ხელისუფლების გადაწყვეტილებას, რომლის მიხედვითაც თბილისმა ოკუპირებული აფხაზეთისთვის ელექტროენერგია შეიძინა.

რაც შეეხება რუსეთიდან შეძენის საკითხს, როგორც თბილისის სახელმწიფო უნივერსიტეტის ეკონომიკური სკოლა ISET-ის ექსპერტმა "ნიუპოსტს" უთხრა, მთავრობამ ყველაზე ოპტიმალური გადაწყვეტილება მიიღო.
"რატომღაც მგონია, რომ ეს არ არის პირველი შემთხვევა, როცა თბილისი რუსეთიდან ყიდულობს აფხაზეთისთვის ელექტროენერგიას. დღეს რატომ მოხდა ამის აფიშირება ნამდვილად არ ვიცი. ჩემი აზრით, არსებობს გარკვეული შეთანხმება, რომ საქრთველომ ენგურჰესიდან უნდა მიაწოდოს ელექტროენერგიის გარკვეული პროცენტი. გამომუშავებული ენერგიის დაახლოებით 40 %. როგორც ჩანს, საქართველომ ვერ უზრუნველყო ელექტროენერგიის მიწოდება და დე-ფაქტო ხელისუფლებისთვის ელექტროენეტგიის შეძენა რუსეთიდან შეძენილი ელექტროენერგიით გადაწყდა. ეს ფაქტი სულაც არ არის კრიტიკის ღირსი. კარგია, რომ არ ჩავაბნელეთ აფხაზეთი, რომელშიც საქართველოს იურიდიქცია არ ვრცელდება, თუმცა ის ჩვენი ქვეყნის ნაწილია"- აღნიშნა ექსპერტმა.
ლევან ფავლენიშვილის თქმით, ოკუპირებული აფხაზეთისთვის ელექტროენერგიის მიწოდება რუსეთის გარეშეც შეიძლებოდა, თუმცა ქართულმა მხარემ ოპტიმალური გადაწყვეტილება მიიღო.
"შეგვეძლო, თურქეთიდან ან ირანიდან გვეყიდა ელექტროენერგი.ა თუმცა, საქართველოს ბიუჯეტს ეს გაცილებით ძვირი დაუჯდებოდა. რუსეთიდან კი გაცილებით იაფად მოხდება ელექტროენერგიის შეძენა"- აღნიშნა ექსპერტმა.
შეგახსენებთ, საქართველოს ენერგეტიკის სამინისტროს განცხადებით, აფხაზეთისთვის ელექტროენერგიის დამატებითი მოცულობები რუსეთისგან თბილისმა შეიძინა.