კალაძე ადასტურებს ოკუპირებული აფხაზეთისთვის რუსეთიდან ელექტროენერგიის მიწოდებას

პოლიტიკა - 14:27, 17 Feb, 2016

1883

ენერგეტიკის მინისტრი ოკუპირებულ აფხაზეთში ელექტროენერგიის რუსეთის ფედერაციიდან შეტანას ადასტურებს, ამის შესახებ განცხადება კახა კალაძემ დღეს გამართულ სპეციალურ ბრიფინგზე გააკეთა:
"მოგეხსენებათ აფხაზეთის ტერიტორიაზე საქართველოს ხელისუფლების იურისდიქცია არ ვრცელდება, მაგრამ საქართველო, საერთაშორისო სამართალი და საერთაშორისო თანამეგობრობა ჩვენი ქვეყნის ოკუპირებულ ტერიტორიებს განვიხილავთ როგორც ქვეყნის შემადგენელ ნაწილს და ჩვენი მთავრობის პასუხისმგებლობაა, რომ ერთნაირად იზრუნოს მოქალაქეებზე. ცნობილია, რომ საქართველოში ელექტროენერგიის მზარდი მოხმარებაა, მათ შორის აფხაზეთის ტერიტორიაზე და შესაბამისად, წელს განსაკუთრებით მწვავედ დადგა აფხაზეთის მომარაგების საკითხი, რადგან შემოსული წყლის რაოდენობამ ვერ უზრუნველყო საკმარისი ელექტროენერგიის გამომუშავება, რამდენიმე კვირაა აფხაზეთში მოქმედებს ელექტორენერგიის შეზღუდული გამოყენება. თუმცა ამან ვერ უზრუნველყო დეფიციტის აღმოფხვრა და სერიოზული საფრთხე შეექმნა ჩვენი მოქალაქეთათვის ელექტროენერგიით უზრუნველყოფას ამ ტერიტორიაზე. შესაბამისად, პრობლემის გადაწყვეტისა და მძიმე შედეგების თავიდან აცილების მიზნით, მოკლევადიან და ოპერატიულ გზად მიჩნეულ იქნა რუსთიდან დამატებითი მოცულობების შემოტანა, რითაც პრობლემა მეტნაკლებად დარეგულირდა, თუმცა აქვე უნდა აღინიშნოს, რომ ამ პრობლემის კომპლექსურად გადაწყეტის საკითხი გაცილებით რთულია და საფუძვლიან მუშაობას საჭიროებს."- განაცხადა კახა კალაძემ.