6 გასროლა - ერთი ძმა მოკლეს, მეორე საავადმყოფოშია - თბილისში მომხდარი მკვლელობის დეტალები

პოლიტიკა - 17:07, 16 Feb, 2016

13806

აღმაშენებლის ხეივანში მდებარე ბენზინგასამართ სადგურზე მომხდარი სისხლიანი გარჩევის შესახებ დამატებითი დეტალები ხდება ცნობილი.
როგორც "ნიუპოსტმა" გაარკვია, ქუჩური გარჩევის შედეგად დაჭრილი და გარდაცვლილი პირები ძმები ზურა და გია ბერიშვილები არიან. ორივე მათგანი 40 წლამდეა.
დაჭრილ მამაკაცს ქირურგიის ინსტიტუტში გადაუდებელი ოპერაცია უტარდება. დაჭრილს დაზიანება თავისა და ფეხის არეში აქვს მიღებული. ამასთან, როგორც "ნიუპოსტის" კორესპოდენტი მკვლელობის ადგილიდან იტყობინება, რამდენიმე წუთის წინ ადგილზე დიდუბე-ჩუღურეთის რაიონული პროკურორი რეზო ნადოი მივიდა.
ნადოიმ ოფიციალურად დაადასტურა, რომ შემთხვევის შედეგად ერთი მამაკაცი მოკლეს, ერთი კი დაჭრილია.

შეგახსენებთ, თბილისში, აღმაშენებლის ხეივანში, ერთ – ერთ ბენზინგასამართ სადგურზე, სროლისას ერთი პირი გარდაიცვალა, ერთი კი დაიჭრა.

კრიმინალურ ფაქტს თვითმხილველები ჰყავს, რომლებიც ყვებიან, რომ 5-6 გასროლის ხმა გაიგეს.

ჯერჯერობით დაუდგენელ პირებს შელაპარაკება ბენზინგასამართი სადგურის უფროსთან მოუვიდათ, რასაც გასროლა მოჰყვა.

ინციდენტში მონაწილე პირები დიღმის ტყისკენ გაიქცნენ, გავრცელებული ცნობით დაკავების ოპერაცია სწორედ ამ ტერიტორიიდან დაიწყო. ბენზინგასამართი სადგური, სადაც მკვლელობა მოხდა, ძმების საკუთრებაა.

მომხდარზე შსს-მ გამოძიება განზრახ მკვლელობის მუხლით დაიწყო. ადგილზე ამ დრომდე მუშაობენ კრიმინალისტები.