აფხაზეთის ე.წ. უშიშროებას NATO-ში საქართველოს გაწევრიანება აშინებს - ,,ეს არის შანსი, დაიბრუნოს აფხაზეთი და სამხ. ოსეთი“

პოლიტიკა - 13:52, 13 Feb, 2016

3003

ნატოს გენერალური მდივნის, იენს სტოლტენბერგის განცხადებას, რომლის თანხმადაც ალიანსის გენ. მდივანმა რუსეთს მოუწოდა, გადახედოს საკუთარ გადაწყვეტილებას აფხაზეთისა და სამხრეთ ოსეთის "დამოუკიდებელ სახელმწიფოებად" აღიარების შესახებ, ოკუპირებული აფხაზეთის ე.წ. უშიშროების საბჭოს მდივანი ეხმაურება.

„საქართველოს ნატო-ში გაწევრიანება აფხაზეთის ეროვნული უსაფრთხოებისთვის პირდაპირი საფრთხეა" - განაცხადა მუჰამედ კილბამ "სპუტნიკ-აბხაზიას თან“ ინტერვიუში.

მისი თქმით, საქართველოს ნატოში გაწევრიანება - ეს არის კარგი შესაძლებლობა, დასავლეთის მხარდაჭერით აღადგინოს ქვეყნის ტერიტორიული მთლიანობა და დაიბრუნოს აფხაზეთი და სამხრეთ ოსეთი.

"აღნიშნული ფაქტი პირდაპირ უქმნის საფრთხეს ჩვენს ეროვნულ უსაფრთხოებას. რუსეთის ფედერაციამ, 2008 წლის აგვისტოში ასობით ათასი ადამიანის სიცოცხლის გადასარჩენად, აფხაზეთისა და სამხრეთ ოსეთის დამოუკიდებლობა აღიარა. ამ გადაწყვეტილების გადახედვა არ იგეგმება არც დღეს და არც ხვალ" - განაცხადა კილბამ.

მისი თქმით, რუსეთსა და აფხაზეთს შორის გაფორმებული "მოკავშირეობისა და სტრატეგიული პარტნიორობის შესახებ შეთანხმება" სტაბილურობის დამატებითი გარანტი გახდა.

"იმ მოვლენების ფონზე, რომელიც ხდება საქართველოს სამხედრო-პოლიტიკურ ბლოკში გაწევრიანების გზაზე და იმ მძიმე პირობების ფონზე, რომელშიც ჩვენი მთავარი სტრატეგიული პარტნიორი აღმოჩნდა, ნათელი ხდება, რომ "მოკავშირეობისა და სტრატეგიული პარტნიორობის შესახებ შეთანხმების" ხელმოწერა ჩვენი დამატებითი დაცვა და სტაბილურობის გარანტია გახდა. აქ იგულისხმება ჯარების გაერთიანებული დაჯგუფების შექმნა, რომელსაც ჩვენს ქვეყანაში მკაცრად აკრიტიკებდნენ" - განაცხადა კილბამ.

მისივე თქმით, საქართველო რომ ნატო-ს წევრი აუცილებლად გახდება და ალიანსი ამაში დაეხმარება, ამის შესახებ ექს-გენერალური მდივანი ანდერს ფოგ რასმუსენიც აცხადებდა. კილბას თქმით, ამჟამინდელი გენერალური მდივანიც იგივე ხაზს მიჰყვება.

"როგორც პრაქტიკა გვაჩვენებს, თბილისს ხშირად სტუმრობენ ნატო-ს მაღალი რანგის წარმომადგენლები და პირობას დებენ, რომ საქართველო მალე ამ "დიდი ოჯახის" სრულფასოვანი წევრი გახდება“ - დასძინა კილბამ.

ოკუპირებული აფხაზეთის ე.წ. უშიშროების საბჭოს მდივნის განცხადებით, რუსეთის ფაქტორს მნიშვნელოვანი ყურადღება უნდა მიექცეს, რადგან „2008 წლის მოვლენების შემდეგ, სწორედ რუსეთის ხელშეწყობით ნატო-ს წევრმა ქვეყნებმა მიიღეს გადაწყვეტილება, რომ საქართველო ალიანსის წევრობის კანდიდატის სტატუსის მისაღებად ჯერ მზად არ არის და მაპ-ის მინიჭება განუსაზღვრელი ვადით გადადეს".