„ეს არის პოლიტიკური გადაწყვეტილება“- „თავისუფალი დემოკრატები" მიშველაძის გათავისუფლებაზე

პოლიტიკა - 20:04, 12 Feb, 2016

1272

ირაკლი ალასანიას გუნდი „საზოგადოებრივი მაუწყებლიდან “ ეკა მიშველაძის გათავისფლებას დაუშვებლად მიიჩნევს. აღნიშნულ ფაქტზე "თავისუფალი დემოკრატები" განცხადებას ავრცელებენ.
"ჩვენთვის, ‘’თავისუფალი დემოკრატებისთვის’’ ყოვლად მიუღებელია საზოგადოებრივი მაუწყებლის ჟურნალისტის ეკა მიშველაძის გათავისუფლების ფაქტი. ერთმნიშვნელოვნად ვაცხადებთ, რომ ეს არის პოლიტიკური გადაწყვეტილება და იგი უკავშირდება პარტია ‘’თავისუფალ დემოკრატებს’’. საზოგადოებრივი მაუწყებლობის ხელმძღვანელობის მხრიდან არაერთხელ იქნა გამოთქმული მოსაზრება, რომ ოპოზიციონერის მეუღლეს არ შეუძლია პოლიტიკური თოქ-შოუ მიყავდეს. სწორედ ეს არის დევნა პოლიტიკური ნიშნით და საქართველოს კანონმდებლობის დარღვევა. ამასთან ერთად ეკა მიშველაძის გათავისუფლება შემადგენელი ნაწილია ხელისუფლების მხრიდან დაწყებული მედია სივრცის გაკონტროლების მცდელობისა. ხელისუფლების სურვილი გააკონტროლოს მედიასივრცე ნათლად გამოვლინდა ეკა მიშველაძის, ინგა გრიგოლიას, ტელეკომპანია ‘’რუსთავი ორის’’ და ''მაესტროს'' შემთხვევაში. განსაკუთრებით აღსანიშნავია, რომ ეს ხდება საარჩევნო წელს და იმის ფონზე, რომ პრემიერმინისტრი საერთაშორისო საზოგადოებას გამჭვირვალე და სამაგალითო არჩევნების ჩატარებას პირდება. მედიის შეზღუდვა კი წინასაარჩევნოდ საარჩევნო გარემოს შეზღუდვას ნიშნავს. თუკი სახელმწიფომ ასეთი ზეწოლა გააგრძელა დაზიანდება, როგორც საქართველოს დემოკრატიული განვითარების მომავალი ასევე საქართველოს საერთაშორისო იმიჯი" - ნათქვამია „თავისუფალი დემოკრატების“ განცხადებაში.