ლეონიდ ჩერნოვეცკის ორგანიზებით გამართული კონკურსის გამარჯვებულებთან ხელშეკრულებები გაფორმდა

პოლიტიკა - 16:03, 12 Feb, 2016

1087

პოლიტიკური მოძრაობის „ბედნიერი საქართველოსთვის“ ლიდერის ლეონიდ ჩერნოვეცკის ორგანიზებით გამართული კონკურსის „ბედნიერი საქართველო: იდეები, მეთოდები, განხორციელება!“ გამარჯვებულებთან ხელშეკრულებები გაფორმდა. პირველ, მეორე და მესამე ადგილებზე გასული კონკურსანტების–ნატო გოგმაჩაძის, თეიმურაზ დიასამიძის და გიორგი შუკაკიძის ნამუშევრებს ლეონიდ ჩერნოვეცკი 10 000, 5 000 და 3 000 ლარად შეისყიდის. შესყიდული ნამუშევრები გამოიყენება ლეონიდ ჩერნოვეცკის პარტიის პროგრამის დებულებების ფორმირების პროცესში.

კონკურსი სოციალურ ქსელში, ლეონიდ ჩერნოვეცკის პირად გვერდზე ერთი თვის განმავლობაში მიმდინარეობდა და მასში ქვეყნის სხვადასხვა რეგიონში მცხოვრებმა რამდენიმე ასეულმა ადამიანმა მიიღო მონაწილეობა. კონკურსის წესების მიხედვით, ნაშრომების ძირითადი საკითხები სწორედ იმ პრობლემებს და მათი გადაწყვეტის მეთოდებს ეხებოდა, რომლებიც მთელი საქართველოსთვის დღეს ყველაზე დიდ გამოწვევებს წარმოადგენს.

კონკურსი იმ მთავარი სოციალური თუ სამართლებრივი პრობლების გამოვლენას ისახავდა მიზნად, რომლებიც განსაკუთრებით მნიშვნელოვანია დღეს საზოგადოებისთვის, მთელი საქართველოს მასშტაბით. ასევე, კონკურსის მიზანი იყო მოქალაქეების ჩართულობის ამაღლება სოციალური, ეკონომიკური, პოლიტიკური და სხვადასხვა სახის საკითხების გადაჭრის გზების ძიებაში.

ლეონიდ ჩერნოვეცკი მომავალშიც არა ერთ საინტერესო პროექტსა და კონკურსს შესთავაზებს საზოგადოებას, რომელთა მიზანი იქნება მოსახლეობის ჩართვა ქვეყნისათვის მნიშვნელოვანი საკითხების გადაწყვეტის პროცესში და აგრეთვე მათი ინიციატივების გათვალისწინება.