1 აპრილიდან ოკუპირებული აფხაზეთის დეფაქტო მთავრობა ცალმხრივად აუქმებს უვიზო რეჟიმს იმ ქვეყნებისთვის , რომლებსაც აფხაზეთის დამოუკიდებლობა აღიარებული არ აქვთ. ამის შესახებ განცხადება აფხაზეთის დე ფაქტო პარლამენტის სპიკერმა ვალერი ბგანბამ გააკეთა:

„აფხაზეთში შესვლის და გასვლის მარეგულირებელ კანონში, რომელიც ძალაში 1 აპრილიდან შევა მთელი რიგი სიახლეებია. ერთ-ერთი სიახლე არის ის, რომ აფხაზეთში ვიზის გარეშე შემოსვლას შეძლებენ მხოლოდ იმ ქვეყნის მოქალაქეები, რომლებსაც აღიარებული აქვთ აფხაზეთის დამოუკიდებლობა და რომლებთანაც არსებობს ორმხრივი უვიზო რეჟიმის შეტანხმება“- განაცხადა ბგანბამ.

ბგანბას განცხადებით დოკუმენტზე მუშაობა 8 წლის განმავლობაში მიმდინარეობდა.მისი თქმით, ვიზების შემოღება გააძლიერებს მიგრაციულ კონტროლს ქვეყანაში. ამასთანავე დე ფაქტო პარლამენტის ხელმძღვანელის თქმით 2018 წლის 1 იანვრიდან იგეგმება მიგრაციის ბარათის შემოღებაც, მანამდე კი ამ ბარათების გამოყენებისთვის აფხაზეთის საზღვრები თანამედროვე ტექნიკით აღიჭურვება.

აფხაზეთთან უვიზო რეჟიმის შეთანხმება ამ დროისთვის ხელმოწერილი და რატიფიცირებული აქვს რუსეთის ფედერაციას და ნიკარაგუას რესპუბლიკას. ვენესუელას, ტუვალუს და ნაურუს ჯერ დოკუმენტის რატიფიცირება არ მოუხდენია.