საქართველოს მედია სივრცეში რუსულენოვანი სატელევიზიო არხის შესაძლო გამოჩენას ოპოზიციის წარმომადგენლები კრიტიკულად აფასებენ. მათი თქმით ძალიან მნიშვნელოვანია გაირკვეს ამ არხის შინაარსობრივი მხარე, იმისთვის, რომ არხი რუსული პროპაგანდის იარაღად არ იქცეს

„უნდა იყოს პროექტი წარმოდგენილი ნათლად, რომელი ტელევიზიის ბაზაზე კეთდება. შინაარსობრივი მხარე ძალიან მნიშვნელოვანია. ღმერთმა დაგვიფაროს, რომ ჩვენ რუსული იდეების პროპაგანდა დავიწყოთ, ეს ისედაც არ გვაკლია, ნებისმიერი საკაბელო მაუწყებელი გადმოსცემს რუსულ არხებს"- განაცხადა „თავისუფალი დემოკრატების“ წევრმა გია ცაგარეიშვილმა „კურიერთან“

„ნაციონალური მოძრაობის“ წევრის გიორგი კანდელაკის შეფასებით, ახალი რუსული არხის გამოჩენის საჭიროება არ არსებობს, რადგან მთავრობა ისედაც ხელს უწყობს რუსული პროპაგანდის გავრცელებას და მას სახელმწიფო ბიუჯეტიდანაც კი აფინანსებს:

„ალბათ ამის საჭიროება არ არის რადგან რუსულ პროპაგანდას და ჩვენი ქვეყნის წინააღმდეგ მიმართულ პროპაგანდას საქართველოს მთავრობა დღეს ბიუჯეტიდან ისედაც აფინანსებს და ეს დოკუმენტურად არის დადასტურებული, რაც ძალიან ადეკვატურად აისახა ამერიკის დაზვერვის დეპარტამენტის ანგარიშში“- აღნიშნა გიორგი კანდელაკმა.