"არსებობს ჩანაწერი" - გოგი თოფაძის სკანდალი გრძელდება

პოლიტიკა - 12:10, 11 Feb, 2016

4301

ბოლო დღეების ყველაზე ხმაურიანი პოლიტიკური სკანდალების ავტორ, გოგი თოფაძეს თავდაცვის რეჟიმში ყოფნა უწევს.

ამჯერად, საქმე დეპუტატის ბრალდებას ეხება - "მრეწველების" ლიდერმა "საქართველო და მსოფლიოსთან" საგაზეთო ინტერვიუში განაცხადა, რომ საგარეჯოში არჩევნები თავდაცვის მინისტრმა თინა ხიდაშელმა გააყალბა.

"ნიუპოსტი" აღნიშნულ განცხადებაზე უმრავლესობის წევრს ესაუბრა, რომელმაც ბრალდება უარყო და ხელი სტატიის ავტორისკენ გაიშვირა.

"ეგ ზღაპრები მოუყევით სხვებს, მეასე კაცი ხართ ვინც მირეკავს. დაურეკეთ ამ სტატიის ავტორს, რომელსაც აქვს ჩანაწერი. დაურეკეთ რედაქციას და მოუსმინეთ ჩანაწერს"- აღნიშნა "ქართული ოცნების" წევრმა.

თოფაძე თავდაცვის მინისტრს მას შემდეგ დაუპირისპირდა, რაც თინა ხიდაშელისგან პარლამენტში დისკრიმინაციული ხასიათის განცხადების გამო საჯარო კრიტიკა დაიმსახურა.

- "რა, თოფაძე დღემდე პარლამენტშია?" - თქვა თემის კომენტირებისას თინა ხიდაშელმა.
დეპუტატმა კი კრიტიკას ბრალდებით უპასუხა:

"წესით და რიგით, ხიდაშელმა, მინისტრის კაბინეტში კი არა, დაკითხვებზე უნდა იაროს, რადგან შარშან, ოქტომბერში, საგარეჯოს რაიონში შუალედური საპარლამენტო არჩევნები გააყალბა და ამ საქმისთვის თავდაცვის სამინისტროს რესურსი გამოიყენა; ესეც არ იკმარა და ბიულეტენების დათვლაში მიიღო მონაწილეობა, ხოლო ამ უმსგავსობის ამსახველი ფოტო სოციალურ ქსელშიც განათავსა. დღემდე ვერ გამიგია, რასთან გვაქვს საქმე: სიბრიყვესთან თუ თავხედობასთან. ხიდაშელმა თავისი უკანონო ქმედებით მთელ კოალიციას თავი მოსჭრა და ყველაფერი წყალში ჩაგვიყარა" - ეს არის ფრაგმენტი გოგი თოფაძის ინტერვიუდან, რომელიც "საქართველო და მსოფლიოში" დაიბეჭდა და რომელსაც დეპუტატი დღეს უარყოფს.

"ნიუპოსტი" უახლოეს პერიოდში "საქართველო და მსოფლიოს" რედაქციის პასუხსაც შემოგთავაზებთ.