პირველად საქართველოში, ქალაქი ოზურგეთი საერთაშორისო ფოლკლორულ ფესტივალს უმასპინძლებს

პოლიტიკა - 19:19, 10 Feb, 2016

730

დღეს საქართველოს კულტურისა და ძეგლთა დაცვის მინისტრმა მიხეილ გიორგაძემ და მინისტრის მოადგილემ ლევან ხარატიშვილმა საქართველოს კულტურის სტრატეგიის დოკუმენტის სამუშაო ვერსიის მორიგი საჯარო პრეზენტაცია ქალაქ ოზურგეთში გამართეს.

,,ერთად შევქმნათ კულტურის პოლიტიკა“- ამ სლოგანით კულტურისა და ძეგლთა დაცვის სამინისტრო, დოკუმენტის სამუშაო ვერსიას რეგიონებს აცნობს.

შეხვედრას გურიის გუბერნატორი გია სალუქვაძე და ქალაქ ოზურგეთის მუნიციპალიტეტის მერი ბეგლარ სიორიძე ესწრებოდნენ. დოკუმენტის სამუშაო ვერსიას რეგიონის კულტურის სფეროს სხვადასხვა დაწესებულების წარმომადგენლებიც გაეცნენ.

როგორც მინისტრმა აღნიშნა, კულტურის სტრატეგიაზე მუშაობის პროცესი 2014 წლიდან დაიწყო და სტრატეგიის მთავარი პრინციპებად ღიაობა, გამჭვირვალობა და ინკლუზიურობა განისაზღვრა. შეხვედრაზე ხაზი გაესვა დოკუმენტის მიღების პროცესში საზოგადოების აქტიურ ჩართულობას. მინისტრის მოადგილემ დოკუმენტის ამოცანებსა და სტრატეგიულ მიმართულებებზე დეტალურად ისაუბრა.

,,მისასალმებელია, როცა ქვეყნის კულტურის სტრატეგიის დოკუმენტის შემუშავების პროცესი ასეთი კოორდინირებული მუშაობით მიმდინარეობს და მასში საზოგადოება და ადგილობრივი თითმმართველობის ორგანოებია ჩართული. ქალაქ ოზურგეთის მუნიციპალიტეტის მერია მზადაა მხარი დაუჭიროს ნებისმიერ წამოწყებას, რომელიც ქვეყნის კულტურულ თუ ეკონომიკურ განვითარებას უკავშირდება“- განაცხადა ქალაქის მერმა, ბეგლარ სიორიძემ.

შეხვედრა კითხვა- პასუხის რეჟიმში გაგრძელდა. მინისტრის განცხადებით, მიმდინარე წელს ქალაქ ოზურეთში აღმოჩენილი უძველესი აბანოების სამეცნიერო კვლევა გაგრძელდება. ასევე, პირველად საქართველოში, ქალაქი ოზურგეთი საერთაშორისო ფოლკლორულ ფესტივალს უმასპინძლებს.