მნიშვნელოვანია, რომ საარჩევნო კოდექსზე შეთანხმება მოხდეს

მნიშვნელოვანია, რომ საარჩევნო კოდექსზე შეთანხმება მოხდეს - ევროკომისარი იოჰანეს ჰანი

პოლიტიკა - 11:06, 10 Feb, 2016

1237

ევროკომისარმა იოჰანეს ჰანმა, საქართველოს პრემიერ-მინისტრთან შეხვედრის შემდეგ გამართულ პრესკონფერენციაზე იმ საკითხებზე ისაუბრა, რომლებზეც აქცენტი გიორგი კვირიკაშვილთან შეხვედრის დროს გაკეთდა. იოჰანეს ჰანის თქმით სასამართლო რეფორმა, მოსამართლეთა და პროკურორთა დამოუკიდებლობა და სხვადასხვა პოლიტიკურ ძალებს და სამოქალაქო სექტორს შორის შეთანხმებული საარჩევნო კოდექსი ის პრიორიტეტებია, რომელზეც საქართველოს მთავრობამ ყურადღება განსაკუთრებით უნდა გაამახვილოს:

„მთავარი ყურადღება უნდა დაეთმოს პრიორიტეტებს, სასამართლო რეფორმას, მოსამართლეებისა და პროკურორების დამოუკიდებლობას და ნდობის აღდგენას სამართალდამცავ სტრუქტურებში. ვაღიარებთ,რომ საქართველომ ბევრი რამ გააკეთა კანონმდებლობის ევროპულთან მიახლოებისთვის. ჩვენ ასევე შევეხეთ საქართველოს მოქალაქეებისათვის უვიზო მიმოსვლის საკითხს, ეს ევროპის ქვეყნებმა და ევროპარლამენტარებმა უნდა გადაწყვიტონ, თუმცა რაც კომისიაზეა დამოკიდებული ყველაფერი ძალიან სწრაფად გაკეთდება. ქართველი ხალხი უნდა დარწმუნდეს, რომ მათ აქვთ პერსპექტივა და გვირაბის ბოლოს სინათლეა. გვინდა რომ არჩევნებამდე ყველაფერი დავალაგოთ, ჩვენ გვაქვს გავლენა იმაზე რომ საქართველომ ფოკუსირება მოახდინოს არჩევნებზე, ამ მხრივ მნიშვნელოვანია, რომ საარჩევნო კოდექსზე მოხდეს შეთანხმება. პრემიერ მინისტრი მზად არის სამოქალაქო საზოგადოებასთან და სხვა პარტიებთან შეთანხმების მისაღწევად სამუშაოდ. ჩვენ განვაგრძობთ მონიტორინგს არჩევნებამდე და არჩევნების დროსაც“ - განაცხადა იოჰანეს ჰანმა.