მღებრიშვილს გუნცაძე შეცვლის? - ,,არ გამიკვირდება კახა თარგამაძე და კალაშოვიც დაწინაურდნენ“

პოლიტიკა - 16:26, 09 Feb, 2016

6769

ირაკლი ღარიბაშვილის გათავისუფლების შემდეგ, მისი კადრებიც ჯერიც დგება.

“ნიუპოსტის“ ინფორმაციით, რამდენიმე კვირაში შინაგან საქმეთა მინისტრი გიორგი მღებრიშვილი პოსტს დატოვებს და მას რკინიგზის სამეთვალყურეო საბჭოს თავმჯდომარე კოკა გუნცაძე შეცვლის.

სამინისტროში ბოლო დროს განხორციელებული ცვლილები - მინისტრის მოადგილეების შეცვლა, თბილისი პოლიციის უფროსის თანამდებობიდან გათავისუფლება, სამხარეო პოლიციის უფროსების შეცვლა, ამის წინაპირობაა.

კოკა გუნცაძის შესაძლო გამინისტრებას არ გამორიცხავს „ნაციონალური მოძრაობის“ ერთ-ერთი ლიდერი გივი თარგამაძე.

„გარკვეული ინფორმაცია მეც მაქვს ამს შესახებ. ბოლო პერიოდში აწყობილი ჯაჭვის სრულიად ლოგიკური გაგრძელება იქნება კოკა გუნცაძის დაწინაურება, რომელიც გია გაჩეჩილაძის მსგავსად, პრემიერ კვირიკაშვილის ძმაკაცია. რასაც ვუყურებთ ერთი მჭიდის ხალხი გამოჩნდა პოლიტიკურ ასპარეზზე. ღარიბაშვილის კლანის შემდეგ ახლა ბადრი პატარკაციშვილის კლანი წინაურდება. ამიტომ არ გამიკვირდება, თუ გუნცაძე შს მინისტრი გახდება, ასევე არ გამიკვირდება რომ მომავალში კახა თარგამაძე და კალაშოვი დაწინაურდეს“- აღნიშნა თარგამაძემ.

კოკა გუნცაძის მაღალ თანამდებობაზე საუბარი ჯერ კიდევ 2007 წელს, ლევან გაჩეჩილაძის ლიდერობით, სააკაშვილის ხელისუფლების წანააღმდეგ გამართული აქციების დროს იყო. მაშინდელი ოპოზიცია მთავრობაში მოსვლისთვის ემზადებოდა და შესაბამისად, თანამდებობესაც იყოფდა. გუნცაძე 2007 წელს ძმები გაჩეჩილაძეების გუნდის წევრი იყო და მაშინ ის პრემიერ-მინისტრად ან შს მინისტრის პოსტზე განიხილებოდა. დგას თუ არა დღის წესრიგში ივანიშვილის გუნდის წინაშე სააკაშვილის ხელისუფლების დროს განუხორციელებელი მიზნები ამას დრო გვიჩვენებს.

“საქართველოს რკინიგზის” საზოგადოებასთან ურთიერთობის სამსახურში გუნცაძის შესაძლო გამინისტებას არასერიოზულს უწოდებენ.

"არასერიოზულია, ჭორია ეს ინფორმაცია, ჭორებზე კი განცხადებას არ ვაკეთებთ"- უთხრა "ნიუპოსტს" რკინიგზის საინფორმაციო სამსახურის უფროსმა დაჩი ცაგურიამ.

გიორგი მღებრიშვილის მოსალოდნელ გადადგომის შესახებ გავრცელებულ ინფორმაციას არ ადასტურებენ შინაგან საქმეთა სამინისტროში.

უწყების საზოგადოებასთან ურთიერთობის სამსახურში "ნიუპოსტს" მინისტრის განცხადება შეახსენეს, რომელიც ამ უკანასკნელმა ამ საკითხზე გააკეთა.

შინაგან საქმეთა მინისტრი გიორგი მღებრიშვილმა ჟურნალისტების მიერ დასმულ შეკითხვაზე მის სავარაუდო გადადგომასთან განაცხადა, რომ ამაზე საუბარი მთავრობაში არ ყოფილა და ეს არის მიზანმიმართული კამპანია.

„არანაირი საუბარი ამის შესახებ არ ყოფილა. მე ვფიქრობ, რომ მიზანმიმართულად მიმდინარეობს ეს კამპანია ჩემს მიმართ და იმ ადამიანების მიმართ, რომლებიც ჩემს შემცვლელებად სახელდებიან. მე ყველა მათგანს უდიდეს პატივს ვცემ, ისინი ჩემი მეგობრები არიან…. კიდევ ერთხელ ვიმეორებ, რომ არანაირი საუბარი ამ თემაზე არ ყოფილა“, – აღნიშნავდა გიორგი მღებრიშვილი.

დავით ჯაბაშვილი