თბილისის მერმა სავარჯიშო-გამაჯანსაღებელი ცენტრის “OkTopUs“-ის სამშენებლო სამუშაოები დაათვალიერა

პოლიტიკა - 14:54, 09 Feb, 2016

1502

თბილისის მერმა დავით ნარმანიამ, „თბილისის მეწარმეობის ხელშეწყობის ცენტრის“ დაფინანსებით დაწყებული სავარჯიშო-გამაჯანსაღებელი ცენტრის, “OkTopUs“-ის სამშენებლო სამუშაოები დაათვალიერა.

ახალ სავარჯიშო-გამაჯანსაღებელ ცენტრს შპს „ფიტამინი“ გახსნის, რომლის განაცხადი შესაბამისმა კომისიამ გასული წლის დეკემბერში განიხილა და დააკმაყოფილა. პროგრამის შესაბამისად, ბენეფიციარმა 70000 ლარი მიიღო ძირითადი საშუალებების ხარჯების თანადაფინანსებისთვის. ცენტრის გახსნის შემდეგ შპს „ფიტამინი“, ასევე, ისარგებლებს ფართის იჯარისა და სესხის პროცენტის თანადაფინანსების კომპონენტებით. სავარჯიშო-გამაჯანსაღებელი ცენტრი გათვლილია 2 000 მომხმარებელზე. ცენტრი 1,425 კვ.მ. ფართობზე განთავსდება და შექმნის 20 მუდმივ სამუშაო ადგილს. ცენტრის გახსნის შემდეგ, თბილისის მერიის მიერ შერჩეული მოწყვლადი ჯგუფების 50 წარმომადგენელი მომსახურებაზე მინიმუმ 50%-იანი ფასდაკლებით ისარგებლებს.

თბილისის მერის დავით ნარმანიას განცხადებით, პროექტის ფარგლებში სოციალურად დაუცველი ადამიანებისთვის სპეციალური შეღავათები გაკეთდება.

„აღნიშნული პროექტი სოციალური დაცვის თვალსაზრისითაც მნიშვნელოვანია. ფიზიკური დატვირთვის მიღება ხელმისაწვდომი გახდება მოწყვლადი ჯგუფებისთვისაც. როგორც ხედავთ, უკვე მიმდინარეობს სამუშაოები. პროექტის დასრულება და გახსნა აპრილის ბოლოსთვის არის ნავარაუდევი“,- განაცხადა დავით ნარმანიამ.

მუნიციპალური პროგრამის ძირითადი მიზანია ბიზნეს საქმიანობის მხარდაჭერის გზით ახალი გამაჯანსაღებელი ცენტრების შექმნისა და არსებული გამაჯანსაღებელი ცენტრების განვითარების ხელშეწყობა, ასევე, მოწყვლადი ჯგუფებისთვის სავარჯიშო-გამაჯანსაღებელი მომსახურების ხელმისაწვდომობის უზრუნველყოფა და თბილისში ჯანსაღი ცხოვრების წესის პოპულარიზაცია.

სანდრო ეულის N7-ში მიმდინარე სამშენებლო სამუშაოები თბილისის მერთან ერთად, „თბილისის მეწარმეობის ხელშეწყობის ცენტრის“ ხელმძღვანელმა ალექსანდრე მარგიშვილმა და საკრებულოს თავმჯდომარემ, გიორგი ალიბეგაშვილმა დაათვალიერეს.