რამდენიმე დღეა მუსიკალურ სამყაროში ორი მაესტროს დაპირისპირებამ სრულიად ინტერნეტ სივრცე მოიცვა. სამწუხაროა, მაგრამ ფაქტია, რომ ეს ყველაფერი რეალურად ხდება. ნიკოლოზ რაჭველისა და ვატო კახიძის დაპირისპირებას თითქოს არავინ იფიქრებდა, თუმცა ფაქტი ფაქტად რჩება. რაჭველი ფეისბუკის საკუთარ გვერდზე პოსტს აქვეყნებს, რომელსაც უცვლელად გთავაზობთ.

„თბილისის ერთადერთი სიმფონიური მუსიკის დარბაზის კარი ეროვნული ორკესტრისთვის დაკეტილია, მიზეზი ზოგჯერ ჩემი პროფესიონალიზმია, ზოგჯერ დარბაზის დატვირთვა, ზოგჯერ ორკესტრისადმი დამოკიდებულება... გული მწყდება, რომ ამ პრობლემამ კულისებიდან ავანსცენაზე გადაინაცვლა, თუმცა ეს არ მოხდებოდა თუნდაც ერთი კეთილი ნაბიჯი რომ გადმოდგმულიყო, თუნდაც სიტყვიერი... ახლა კი საზოგადოებამ გადაწყვიტოს ჩვენი ბედი! ყოველთვის ჩემი ხალხის, მუსიკით შეძენილი გულშემატკივრების იმედად ვიყავი, არც სახელოვანი მშობლები მყოლია და არც მდიდარი ნათესავები... ასე მოვედი აქამდე... დღეს კი მყავს არმია საოცარი მუსიკოსების, რომელთა წინაშე თავს ვალდებულად მივიჩნევ, რომ ისინი ღირსეულად მოღვაწეობდნენ საკუთარ სამშობლოში! ხოდა მეც წავედი კომპრომისზე საკუთარ თავთან და ვეღარ დავმალე წლების მანძილზე ნატარები გულისტკივილი...“- წერს ნიკოლოზ რაჭველი სოციალურ ქსელში.