საქართველოში კრიზისების მართვის ეროვნული სიტუაციური ოთახი ამოქმედდა

პოლიტიკა - 18:43, 08 Feb, 2016

1513

საქართველოში კრიზისების მართვის ეროვნული სიტუაციური ოთახი ამოქმედდა. ეროვნული სიტუაციური ოთახის გახსნის ღონისძიებას საქართველოს პრემიერ მინისტრი გიორგი კვირიკაშვილი, სახელმწიფო უსაფრთხოებისა და კრიზისების მართვის საბჭოს მდივანი მინდია ჯანელიძე, მთავრობის წევრები, დეპუტატები და დიპლომატიური კორპუსის წარმომადგენლები ესწრებოდნენ.
სახელმწიფო უსაფრთხოებისა და კრიზისების მართვის საბჭოს მდივანმა მინდია ჯანელიძემ ხაზი გაუსვა ეროვნული სიტუაციური ოთახის მნიშვნელობას. მან მადლობა გადაუხადა დიდი ბრიტანეთის ელჩს, ქალბატონ ალექსანდრა ჰოლ ჰოლის და საგარეო უსაფრთხოებისა და კრიზისების მართვის სფეროში ბრიტანეთის მთავრობის მრჩეველს, გენერალ სერ გარი ჯონსონს ცენტრის ჩამოყალიბებაში გაწეული დახმარებისთვის.
როგორც საქართველოს პრემიერ მინისტრმ გიორგი კვირიკაშვილმა სიტყვით გამოსვლისას განაცხადა, კრიზისებზე მყისიერი რეაგირება, ადეკვატური მართვა და მოსახლეობის უსაფრთხოების უზრუნველყოფა ნებისმიერი ქვეყნის მთავრობისთვის ერთ-ერთი მთავარი გამოწვევაა. „ჩვენ ვცხოვრობთ გამოწვევებით სავსე რეგიონში. გამოწვევები არის სხვადასხვაგვარი, ეს არის ის გამოწვევები, რომლებიც მომდინარეობს ჩვენი ტერიტორიული მთლიანობისა თუ ოკუპირებული ტერიტორიების თემებიდან. ეს არის ასევე სხვადასხვა ბუნებრივი კატაკლიზმებით გამოწვეული საფრთხეები, რომელიც ასევე მრავლად არის ჩვენს რეგიონში. ამ ტიპის საფრთხეებთან გამკლავებას სჭირდება მეტი კოორდინაცია და სწორედ ეროვნული სიტუაციური ოთახი არის ის ბრიტანული მოდელი, რომელიც დაინერგება საქართველოში. იგი იძლევა საშუალებას სხვადასხვა უწყებებს შორის იყოს მაქსიმალური კოორდინაცია, რათა მაქსიმალური ეფექტურობით გავუმკლავდეთ კრიზისულ სიტუაციებს," - განაცხადა პრემიერმა სიტყვით გამოსვლისას. მისი თქმით, პროექტს საფუძველი ჩაეყარა ირაკლი ღარიბაშვილის პრემიერობის დროს და წარმატებით განხორციელდა.
პრემიერ მინისტრმა მადლობა გადაუხადა უსაფრთხოებისა და კრიზისების მართვის საბჭოს აპარატს და საბჭოს მდივანს მინდია ჯანელიძეს, ასევე უცხოელ პარტნიორებს.
ეროვნული სიტუაციური ოთახი თანამედროვე ტექნიკური საშუალებებით აღჭურვილი პუნქტია, საიდანაც კრიზისული მდგომარეობის მართვა განხორციელდება. აქ შექმნილია საერთო სივრცე და ყველა პირობა სხვადასხვა უწყების 100-მდე თანამშრომლის მუშაობისთვის, რაც აუმჯობესებს მართვის და კოორდინაციის ხარისხს.
თანამედროვე აპარატურა ინციდენტების ადგილიდან ინფორმაციის (მათ შორის ვიდეო-აუდიო სიგნალების) ოპერატიულად გადმოცემის საშუალებას იძლევა, რაც გაამარტივებს გადაწყვეტილების მიღების პროცესს.