საქართველოს ამოცანა არ არის MAP-ი, ჩვენი მიზანი არის წევრობა- თინათინ ხიდაშელი

პოლიტიკა - 14:33, 08 Feb, 2016

1351

თავდაცვის მინისტრის განცხადებით საქართველოს მიზანი ნატოს წევრობაა და არა MAP -ის მიღება. აღნიშნული განცხადება თინათინ ხიდაშელმა "მოამბის" ეთერში ჩრდილოატლანტიკური ალიანსის სპეციალური წარმომადგენელის ჯეიმს აპატურაის განცხადების კომენტირებისას გააკეთა , რომლის თქმითაც ალიანსის წევრებს შორის საქართველოს მაპ-ის საკითხზე თანხმობა ჯერ არ არის.

„საქართველოს ამოცანა და მიზანი არ არის MAP-ი. ჩვენ, ქართული სახელმწიფო არ ვითხოვთ MAP-ს და არ ვსაუბრობთ MAP-ზე. ჩვენი ამოცანა ძალიან მარტივია - ეს არის წევრობა,“ - აღნიშნა თინათინ ხიდაშელმა.

თავდაცვის უწყების ხელმძღვანელმა რუსეთის მხრიდან საქართველოს ნატოში გაწევრიანების შესაძლო დაბლოკვის შესახებაც გააკეთა კომენტარი და მაგალითად შვედეთი და ფინეთი მოიყვანა:

„ხვალ შვედეთმა და ფინეთმა, სადაც საუბრებია დაწყებული, რომ გადაწყვიტოს ნატოს წევრობა, ფიქრობთ, რომ მას ჯერ MAP-ს შესთავაზებენ და შემდეგ წევრად მიიღებენ? პირველ რიგში ამ კითხვაზეა პასუხი გასაცემი. არსებობს რეალობები. ეს რეალობები იცვლება იმის მიხედვით, როგორც იცვლება გარემო. შვედეთთან და ფინეთთან მიმართებაში იმიტომ არის განსხვავებული რეალობა, რომ გარემოა განსხვავებული. ჯეიმს აპატურაიმ ძალიან გასაგებად, ნათლად, დამარცვლით თქვა საკუთარ ინტერვიუში, რომ გეოპოლიტიკური ვითარების ცვლილების შესაბამისადო. ამიტომ, ნუ გამოვეკიდებით ფანტომებს, ნუ გამოვეკიდებით იმას, რაც არ არის ქვეყნის ამოცანა. არ არის ჩვენი ოცნება და ამოცანა MAP-ის მიღება. ჩვენ დღეს უნდა ვემზადოთ იმისთვის, რომ ხვალ, როდესაც გაიხსნება ეს ფანჯარა და აუცილებლად გაიხსნება ეს ფანჯარა საქართველოსთან მიმართებაში, ზუსტად ისე, როგორც გაიხსნა ბალტიისპირეთთან, პოლონეთთან, ჩეხეთთან მიმართებაში, ასევე გაიხსნება საქართველოსთან მიმართებაში. კარს არავინ გაგვიღებს, რუსეთი ამას არასდროს დათანხმდება, მაგრამ ფანჯარა აუცილებლად გაიღება. ამიტომ, ჩვენი ამოცანა არის ის, რომ ყველაფერი გავაკეთოთ ქართულმა სახელმწიფომ, ერთის მხრივ და პარტნიორებმა მხარდაჭერის ფარგლების, პარამეტრების, შესაძლებლობების გაზრდაში დახმარების თვალსაზრისით, რომ ნებისმიერ წამს, როდესაც გეოპოლიტიკური სურათი შეიცვლება, საქართველო მზად იყოს ამ ფანჯარაში შესასვლელად,“ - განაცხადა თინათინ ხიდაშელმა.