,,ჩვენი ამოცანაა ავამოქმედოთ ყველა მიძინებული პოტენციალი“ - ,,თავისუფალმა დემოკრატებმა“ თბილისის კონფერენცია გამართეს

პოლიტიკა - 17:15, 07 Feb, 2016

1125

დღეს, „თავისუფალი დემოკრატების“ თბილისის საქალაქო ორგანიზაციის კონფერენცია გაიმართა. კონფერენციაზე თბილისის საქალაქო ორგანიზაციის თავმჯდომარედ ზურაბ აბაშიძე აირჩიეს. ზურაბ აბაშიძე თბილისის ორგანიზაციის მიერ, ამ პოსტზე წარდგენილილი ერთადერთი კანდიდატი იყო. ასევე არჩეულ იქნა თბილისის საქალაქო ორგანიზაციის გამგეობა, რომელიც 27 წევრისგან შედგება. კონფერენციაზე სიტყვით გამოვიდა „თავისუფალი დემოკრატების“ ლიდერი ვიქტორ დოლიძე, რომელმაც საქართველოს ევროპულ პერსპექტივებზე ისაუბრა. ასევე დღევანდელ ღონისძიებაზე თამარ ამაშუკელმა თბილისის განვითრების სტრატეგია წარმოადგინა, ხოლო ვასილ რევიშვილმა პარტია „თავისუფალი დემოკრატების“ ეკონომიკურ ხედვაზე გაამახვილა ყურადღება. თბილისის ორგანიზაციის თავმჯდომარის და გამგეობის წევრების არჩევის შემდეგ დელეგატებს სიტყვით მიმართა თბილისის ორგანიზაციის არჩეულმა თავმჯდომარემ ზურაბ აბაშიძემ. კონფერენციის დასასრულს დამსწრე საზოგადოებას სიტყვით მიმართა „თავისუფალი დემოკრატების“ ლიდერიმა ირაკლი ალასანიამ.

„სწორედ გაუტეხელობა, უკომპრომისობა, ჯიუტი ოპტიმიზმი არის საფუძველი, რაზეც "თავისუფალი დემოკრატები" საკუთარ პარტიასაც და საკუთარ თავსაც საზოგადოებაში გამოკვეთილად ვხედავთ. ჩვენი ამოცანაა ავამოქმედოთ ყველა მიძინებული პოტენციალი. ჩვენი ამოცანაა, მოვიხმოთ და გავაძლიეროთ ყველა რესურსი, გამოვიყენოთ ის გამოუყენებელი შესაძლებლობები, რომელიც დღეს უქმად არის ჩვენი ხელისუფლების დაუგეგმავი, არათანმიმდევრული, გულგრილი დამოკიდებულების გამო" - განაცხადა ირაკლი ალასანიამ.

დღევანდელი კონფერენციით დასრულდა თბილისის ორგანიზაციის სტრუქტურული ფორმირება. თბილისში „თავისუფალ დემოკრატებს“ უკვე აქვთ სრულად გამართული ათი რაიონული ორგანიზაცია. აღსანიშნავია, რომ ეს ორგანიზაციები ჩამოყალიბდა თვითმმართველობის პრინციპზე დაფუძნებით. პარტიის რაიონული კონფერენციების მიერ არჩეულ იქნა გამგეობები, რომლებმაც თავის მხრივ, საკუთარი რიგებიდან აირჩიეს რაიონული ორგანიზაციების თავმჯდომარეები, რაც მნიშვნელოვანი ნაბიჯი იყო შიდა პარტიული დემოკრატიისთვის.