6 თებერვალს, „კურიერში“ თავისუფალი დემოკრატების ლიდერმა ირაკლი ალასანიამ გააკეთა განცხადება, რომ სტრატეგიული ოპტიკურ-ბოჭკოვანი არხი შესაძლოა, რუსეთის ხელში აღმოჩნდეს. საუბარია კომპანია "ვიმ-პელ-კომზე", რომელიც რუსეთის მიერ ოკუპირებულ აფხაზეთშიც ოპერირებს.

ამ საკითხთან დაკავშირებით „რუსთავი 2-თან“ კომენტარი გააკეთა კომუნიკაციების მარეგულირებელი კომისიის თავმჯდომარემ, ვახტანგ აბაშიძემ. მან აღნიშნა, რომ მაგისტრალური არხის გასხვისების საკითხი რუსულ კომპანიაზე დღეის წესრიგში არ დგას. მან დაადასტურა, რომ რამდენიმე ხნის წინ მარეგულირებელ კომისიაში შევიდა კავკასუს ონლაინისა და მობიტელის განაცხადი, სადაც საუბარია ორ კომპანიას შორის საცალო სეგმენტის გადანაწილებაზე. კერძოდ, კავკასუს ონლაინი მობიტელს გადასცემს ინტერნეტმომსახურებას.

„ოპტიკურ-ბოჭკოვანი მაგისტრალისა და საერტთოდ, საქართველოს ტერიტორიაზე გამავალი მაგისტრალების გაყიდვის საკითხი დღის წესრიგში არ დგას, განიხილება საკითხი საცალო სეგმენტის შესაძლო გასხვისებაზე კომპანია მობიტელისთვის, რომლის ერთერთი დამფუძნებელი გახლავთ რუსული ვიმ-პელ-კომი,“ - აცხადებს აბაშიძე.