ცნობილ ამერიკელი მკვლევარი დონალდ ჯენსენი „ამერიკის ხმასთან“ ინტერვიუში რუსეთის საგარეო საქმეთა მინისტრის განცხადებას გამოეხმაურა. ჯენსენის შეფასებით პანკისის ხეობაში ტერორისტების ბაზის არსებობასთან დაკავშირებით ლავროვის მიერ გაკეთებული განცხადება სახიფათოა და შეიძლება ეს რუსეთმა საქართველოში მორიგი შეჭრის საბაბად გამოიყენოს:

„რა თქმა უნდა, ამიტომაც თქვა ეს ლავროვმა. მსგავსი რიტორიკა ხალხში ერთგვარ მოლოდინებს ქმნის. ტერორიზმთან ბრძოლაში რუსეთი დასავლეთის მოკავშირეა, რაც მას გარკვეულ დაუსჯელობის სტატუსს ანიჭებს. თუ რუსეთი ამტკიცებს, რომ საქართველოში ტერორისტები არიან და ამას პანკისში შესასვლელად გამოიყენებს, მერე ყველას ეტყვის, რომ ეს ანტიტერორისტული ოპერაცია იყო.

მეორე სახიფათო საკითხია კრემლის მიერ საქართველოს საშინაო საკითხებში ჩარევა, თითქოს კრემლს უფლება ჰქონდეს ეს გააკეთოს. საქართველო დამოუკიდებელი ქვეყანაა, რუსეთის საქმე არ არის საქართველოს ეროვნულ უსაფრთხოებაზე საუბარი თუ ამას საქართველო არ სთხოვს და საქართველოს ეს არ უთხოვია.“- აცხადებს ჯენსენი.