საქართველოს მთავრობამ ფეხბურთის განვითარების სახელმწიფო პროგრამა დაამტკიცა

პოლიტიკა - 19:26, 04 Feb, 2016

1646

საქართველოს მთავრობის გადაწყვეტილებით, „საქართველოს მთავრობის სტრუქტურის, უფლებამოსილებისა და საქმიანობის წესის შესახებ" საქართველოს კანონის მე-5 მუხლის „ვ" ქვეპუნქტის საფუძველზე, საქართველოში ფეხბურთის განვითარების (2016-2020 წლები) სახელმწიფო პროგრამა დამტკიცდა.

„ყოველგვარი გადამეტების გარეშე შეიძლება ითქვას, რომ ისტორიული დღეა ქართული ფეხბურთისთვის. ამ დღეს ჩვენი ფეხბურთი და გულშემატკივარი 25 წელიწადს ელოდა! მსურს მადლობა გადავუხადო ფეხბურთის ფედერაციის ახალ ხელმძღვანელობას - მათ უმოკლეს ვადაში წარმოადგინეს ფეხბურთის განვითარების საინტერესო პროექტი. ასევე მადლობელი ვარ მთავრობის წევრების, რომლებიც დეტალურად გაეცნენ ამ პროექტს და მხარი დაუჭირეს მის განხორციელებას. უახლოესი ხუთი წლის განმავლობაში ქართული ფეხბურთი ფინანსურად მხარდაჭერილი იქნება. ამ პროექტით უმაღლესი და პირველი ლიგის კლუბებს განვითარების კარგი შანსი ეძლევათ, ფუნდამენტური კი ისაა, რომ ბავშვთა ფეხბურთის პრობლემების მოგვარების შანსი გაგვიჩნდება", - განაცხადა სპორტისა და ახალგაზრდობის საქმეთა მინისტრმა ტარიელ ხეჩიკაშვილმა.

სახელმწიფო პროგრამის მიზნები და ამოცანებია: ფეხბურთის მართვის თანამედროვე სტანდარტების დანერგვა; კონკურენტიანი, თავისუფალი საფეხბურთო ბაზრის შექმნა; ქალთა და ჭაბუკთა პირველობები, რეგიონული ტურნირები, ფუტსალი, პლაჟის, ქუჩის და შშმ პირთა ფეხბურთი, სასკოლო შეჯიბრებები; საფეხბურთო ინფრასტრუქტურის მოწესრიგება; საფეხბურთო განათლების ხელშემწყობი შესაბამისი პროგრამების შემუშავება და განხორციელება; კლუბების ფინანსური სტიმულირება, საბაზისო, საპრიზო და პრემიალური დაფინანსება.

საქართველოს მთავრობის გადაწყვეტილებით, 2016-2020 წლებში ფეხბურთის განვითარების პროგრამა 265 მილიონ 700 ათას ლარით დაფინანსდება. პროგრამის დეტალურ პრეზენტაციას საქართველოს ფეხბურთის ფედერაცია უახლოეს მომავალში უზრუნველყოფს.