საპატრიარქო განცხადებას ავრცელებს

პოლიტიკა - 11:21, 04 Feb, 2016

2725

„რელიგიური გრძნობების შეურაცხყოფასთან“ დაკავშირებით პარლამენტარ სოსო ჯაჭვლიანის საკანონმდებლო ინიციატივას , საპატრიარქო სპეციალური განცხადებით გამოეხმაურა. საპატრიარქოში აცხადებენ, კანონპროექტის მიღება საქართველოს საპატრიარქოს ინიციატივა არ ყოფილა. საპატრიარქოს განცხადებას ,,ჯი-ეიჩ-ენი“ უცვლელად გთავაზობთ:

"როგორც ცნობილია, საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტმა პირველი მოსმენით მხარი დაუჭირა კანონპროექტს, რომელიც ითვალისწინებს ადმინისტრაციული სახდელის შემოღებას რელიგიური გრძნობების შეურაცხყოფისათვის. სოციალურ ქსელებშიც და ზოგიერთ საინფორმაციო საშუალებებში ვრცელდება ინფორმაცია ამ კანონპროექტთან საპატრიარქოს კავშირის შესახებ, მიაჩნიათ რა, რომ მისი მიზანი თითქოს საქართველოს მართლმადიდებელი ეკლესიისთვის "ჯანსაღი კრიტიკის აცილებაა," რაც რეალობას არ შეესაბამება. მიუხედავად იმისა, რომ ქვეყანაში ძალიან ხშირია ეკლესიისა და მისი საჭეთმპყრობელის მიმართ ცილისწამებლური და სიძულვილის ენის შემცველი განცხადებები და გამოსვლები, მსგავსი კანონპროექტის მიღების საკითხი არც ადრე და არც ამჟამად ჩვენი ინიციატივა არ ყოფილა.
რელიგიურ თემებთან დაკავშირებულ ამ და სხვა მნიშვნელოვან პრობლემებთან მიმართებაში მომავალ სამშაბათს საქართველოს საპატრიარქოში ინტერრელიგიურ საბჭოში შემავალი რელიგიური გაერთიანებების სამუშაო შეხვედრა იგეგმება"- ნათქვამია განცხადებაში.