"პრეზიდენტის მკაფიო გზავნილი"- კაციტაძე მარგველაშვილის პოზიციას მიესალმება

პოლიტიკა - 18:47, 03 Feb, 2016

1126

საქართველოს პრეზიდენტის გიორგი მარგველაშვილის მიერ საპარლამენტო ტრიბუნიდან საარჩევნო სისტემის ცვლილებაზე გაკეთებულ განცხადებას დადებითად აფასებს „ახალი მემარჯვენეების“ ლიდერი მამუკა კაციტაძე.

როგორც ინტერპარტიული ჯგუფის ერთ-ერთმა წევრმა „ნიუპოსტს“ განუცხადა, პრეზიდენტის გამოსვლა მიმოხილვითი ხასიათის იყო, თუმცა საარჩევნო გარემოზე ქვეყნის პირველმა პირმა მკაფიო პოზიცია დააფიქსირა.

„პრეზიდენტმა სამი კონკრეტული ინიციატივა დააყენა, ამ სამი ინიციატივიდან ორი საარჩევნო თემას ეხებოდა. პირველი 2016 წლის საპარლამენტო არჩევნებს ეხებოდა მან ერთმნიშვნელოვნად აღნიშნა, რომ არსებობს ფართო კონსენსუსი, რომელიც მდგომარეობს პროპორციული წესით არჩევნების ჩატარება სწორედ მიმდინარე წელს. ეს იყო მკაფიო პოზიცია და გზავნილი. პრეზიდენტის აღნიშნული პოზიცია ჩვენთვის სიურპრიზი არ ყოფილა, მაგრამ როცა უმაღლეს საკანონმდებლო ორგანოში, პრეზიდენტის წლის გამოსვლაში ერთმნიშვნელოვნად სვამ საკითხს, ეს არის ძალიან მნიშვნელოვანი ქართველი ამომრჩევლისთვის, საერთაშორისო თანამეგობრობისა და იმ დიპლომატიური წარმომადგენელებისთვის, რომლებიც იყვნენ დღეს პარლამენტში მიწვეულნი “- აღნიშნა კაციტაძემ.

მისი თქმით, ამ განცხადების შემდეგ „ქართული ოცნების“ ლიდერთა მხრიდან ყოველგვარი კონსენსუსის დაკნინებაირონიული ხდება.

პრეზიდენტმა ყოველწლიური ანგარიშის წარდგენისას საარჩევნო გარემოზე ვრცლად ისაუბრა, გიორგი მარგველაშვილმა 2016 წლის საშინაო გამოწვევად საპარლამენტო არჩევნები დაასახელა. პრეზიდენტის თქმით, კითხვის ნიშნების არსებობის შემთხვევაში ქვეყანას ეყოლება პოლიტიკური ელიტა, მაგრამ ქვეყანა და საზოაგდოება არ იქნება მოგებული.

გიორგი მარგველაშვილმა ხაზი გაუსვა, რომ საარჩევნო რეფორმა, რომელიც მაჟორიტარული სისტემის ცვლილებას გულისხმობს და რომლის ირგვლივაც პოლიტიკური სპექტრი და არასამთავრობო სექტორი გაერთიანდა, უნდა განხორციელდეს არა 2020 არამედ 2016 წელს.