"პრეზიდენტი ყველა თემას შეეხო"- ზურაბ აბაშიძე მარგველაშვილის გამოსვლას დადებითად აფასებს

პოლიტიკა - 15:58, 03 Feb, 2016

771

პრეზიდენტის ყოველწლიური ანგარიში „თავისუფალი დემოკრატების“ წევრმა ზურაბ დადებითად აბაშიძემ შეაფასა. აბაშიძის თქმით გიორგი მარგველაშვილი თავის გამოსვლაში ყველა მნიშვნელოვან საკითხს შეეხო.

„სასამართლო სისტემის პრობლემებზე პრეზიდენტი საუბრობს კარგა ხანია, ვსაუბრობთ ჩვენც და საზოგადოებაც. რეფორმა სამწუხაროდ დაგვიანებულია. არის ჩამორჩენები დაწყებული წინა ხელისუფლებიდან დამთავრებული ამ ხელისუფლებით. პროკურატურის რეფორმაც ილუზორული ფორმით ჩატარდა. პრეზიდენტი ყველა თემას შეეხო , ეს ყველაფერი შემადგენელი ქვაკუთხედია ჩვენი სახელმწიფოს განვითარების, ამავდროულად მნიშვნელოვანი თემაა ევროპული და ევროატლანტიკური მისწრაფებების გაღრმავება ქვეყანაში და ამის კულმინაციაა არჩევნები, საარჩევნო სისტემის რეფორმირება და პარტიების განვითარება“- განაცხადა ზურაბ აბაშიძემ.

„თავისუფელი დემოკრატების“ ერთ-ერთი ლიდერი, „გაზპრომთან“ მოლაპარაკებების გამჭვირვალეობასთან დაკავშირებით პრეზიდენტის მოსაზრებასაც გამოეხმაურა. ზურაბ აბაშიძე გიორგი მარგველაშვილს ეთანხმება და აღნიშნავს, რომ მთავრობა ესაუბრებოდეს ხალხს და უხსნიდეს რაშია საქმე, რადგან ენერგოუსაფრთხოების საკითხში გამჭვირვალობის თემა უმნიშვნელოვანესია:

„საქართველოს მოქალაქეები იმსახურებენ იმას, რომ მთავრობა ესაუბრებოდეს ხალხს და უხსნიდეს რაშია საქმე, რაც სამწუხაროდ ჩვენ ბოლო პერიოდში ვერ დავინახეთ. მოსახლეობას ინფორმაცია არ გააჩნია გზაზპრომთან დაკავშირებით, იმ სახელმწიფოს გაზთან, რომელიც ჩვენს მიმართ მტრულად არის განწყობილი, ტერიტორიები აქვს ოკუპირებული, არ გვაქვს დიპლომატიური ურთიერთობები, ეს კომპანია დაკავშირებულია რუსეთის ხელისუფლებასთან და გამოყენებულია როგორც ბერკეტი, მთელ მსოფლიოსთან, მათ შორის საქართველოსთან საურთიერთობოდ“- აღნიშნა ზურაბ აბაშიძემ.