იუსტიციის საბჭოდან მოსამართლეთა გამოცდების ტესტების პასუხების შესაძლო გატანის ფაქტს იუსტიციის საბჭოს ხელმძღვანელი ნინო გვენეტაძე გამოეხმაურა. გვენეტაძის თქმით საბჭო ამ საკითხს შეისწავლის , შესწავლის შედეგებს კი საზოგადოებას და მედიას გააცნობს . უზენაესი სასამართლოს თავმჯდომარე ჯერჯერობით ამ საქმეში საგამოძიებო ორგანოების ჩართვას საჭიროდ არ თვლის. მისი თქმით ჯერჯერობით ეს საბჭოს მოკვლევის საგნად რჩება.

ასევე ნინო გვენეტაძემ გადაცემა "არჩევანში" პირდაპირი ჩართვისას დაადასტურა, რომ ერთ-ერთი კონკურსანტს ირინე ხერხეულიძეს, რომელმაც 100 დან 100 ქულა მიიღო, მასთან პირადი ნაცნობობა აკავშირებს. მისი ნაშრომი წარდგენილია სამართლის დოქტორი ხარისხის მოსაპოვებლად და ამ ნაშრომის ხელმძღვანელი თავად ნინო გვემეტაძე იყო. თუმცა ნინო გვენეტაძის თქმით გამოცდების წინ ხერხეულიძეს მასთან კონსულტაციები არ ქონია და მას არ აქვს უფლება ირინე ხერხეულიძის მიერ მიღებული ქულების სამართლიანობაში ეჭვი შეიტანოს.

შეგახსენებთ, თბილისის საქალაქო სასამართლოს თავმჯდომარემ მამუკა ახვლედიანმა იუსტიციის უმაღლეს საბჭოში მოსამართლეთა შერჩევა-დანიშვნის პროცესის დროს არსებულ დარღვევებთან დაკავშირებით არასამთავრობო ორგანიზაციებთან შეხვედრა გამართა. ახვლედიანმა არასამთავრობო სექტორს დარღვევებთან დაკავშირებით კონკრეტული დოკუმენტაცია გააცნო, რომლითაც დგინდება, რომ მოსამართლეთა საკვალიფიკაციო გამოცდისას ერთ-ერთმა კონკურსანტმა წინასწარ იცოდა ტესტის პასუხები. ახვლედიანის თქმით ამჟამად საუბარი ერთ კონკურსანტზეა თუმცა სავარაუდოა, რომ ეს რიცხვი გაცილებით დიდია.