ოთარ დანელია კომპანიების „ლაქტალისა“ და „სანტეს“ წარმომადგენლებს შეხვდა

პოლიტიკა - 19:04, 02 Feb, 2016

1192

სოფლის მეურნეობის მინისტრი ოთარ დანელია რძის პროდუქტებისა და ყველის უმსხვილესი მწარმოებელი კომპანიის "ლაქტალის ჯგუფის" ვიცე–პრეზიდენტს, მიშელ ნალეს, "ჯი–ემ–თი ჯგუფის" პრეზიდენტს, გიორგი თავაძეს და კომპანია "სანტეს" გენერალურ დირექტორს, ერეკლე გამყრელიძეს შეხვდა.

შეხვედრაზე ადგილობრივი რძისა და რძის პროდუქტების წარმოების განვითარების პერსპექტივები და მსოფლიო ბაზარზე მისი პოპულარიზაციის საკითხები განიხილეს. ფრანგული კომპანია "ლაქტალისი" რძის პროდუქტების მწარმოებელი ქართული კომპანიის "სანტეს" ერთ-ერთი აქციონერი გახდა, რაც კომპანიას მისცემს საშუალებას წარმოაჩინოს ქართული პროდუქტები მსოფლიო ბაზარზე და განავითაროს ადგილობრივი რძისა და რძის პროდუქტების წარმოება. შეხვედრაზე აღინიშნა, რომ მსოფლიოში უმსხვილესი ფრანგული კომპანიის "ლაქტალის“ ქართულ ბაზარზე შემოსვლა მნიშვნელოვან წვლილს შეიტანს ქართული რძის პროდუქტების პოპულარიზაციაში და ხელს შეუწყობს ქართული ეკონომიკის განვითარებას.

"ლაქტალის ჯგუფის" ვიცე–პრეზიდენტმა, მიშელ ნალემ სოფლის მეურნეობის მინისტრს კომპანიის საქმიანობისა და სამომავლო გეგმების შესახებ ინფორმაცია მიაწოდა და აღნიშნა, რომ საერთაშორისო სტანდარტებით წარმოებული ქართული რძის პროდუქტები ექსპორტზე ქართული სავაჭრო ნიშნით გავა. შეხვედრაზე საუბარი შეეხო ქართული ყველისა და მაწვნის ბრენდირების და საექსპორტო პოტენციალის საკითხებს.

ოთარ დანელიამ შეხვედრაზე აღნიშნა, რომ ქვეყნისთვის მნიშვნელოვანია ქართულ ბაზარზე მსოფლიო ბრენდის შემოსვლა. მინისტრმა ვრცლად ისაუბრა ქართული ყველის ისტორიის და სახეობების შესახებ და აღნიშნა, რომ ქართული ყველის წარმოების ხელშეწყობისა და პოპულარიზაციის მიზნით, სოფლის მეურნეობის სამინისტროს მიერ ორგანიზებულმა ყველის ფესტივალმა ტრადიციული სახე მიიღო.

შეხვედრაზე საუბარი შეეხო სურსათის ეროვნული სააგენტოს და სასოფლო-სამეურნეო კოოპერატივების განვითარების სააგენტოების საქმიანობას, ასევე ფერმერთა რეგისტრაციის პროგრამას. შეხედრაზე ოთარ დანელიამ ხაზი გაუსვა ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმების (DCFTA) მნიშვნელობა და აღნიშნა, რომ აღებული ვალდებულებების შესრულების პროცესი წარმატებით ხორციელდება.

სოფლის მეურნეობის სამისნიტროში გამართულ შეხვედრას მინისტრის პირველი მოადგილე ნოდარ კერესელიძე, მინისტრის მრჩეველი ზურაბ ჩეკურიშვილი და სურსათის ეროვნული სააგენტოს უფროსი ზაზა დოლიძე ესწრებოდნენ.