„ქართული ოცნება კრიტიკას გაექცა“- რატომ გააუქმა ზვიად კვაჭანტირაძემ ევროსაბჭოში ვიზიტი

პოლიტიკა - 18:09, 02 Feb, 2016

1454

არასაპარლამენტო ოპოზიციამ სტრასბურგში ვიზიტი დაასრულა. საარჩევნო გარემოზე მომუშავე ჯგუფი სხვადასხვა პოლიტიკურ ჯგუფებს შეხვდა და საქართველოში არსებული საარჩევნო სისტემის მანკიერების შესახებ ინფორმაცია გააცნო.

ოპოზიციონერებმა საზღვარგარეთ გამართული მაღალი რანგის შეხვედრები დადებითად შეაფასეს.

როგორც „ნიუპოსტს“თავისუფალი საქართველოს თავმჯდომარემ კახა კუკავამ განუცხადა, მათ მიიღეს დაპირება რომ შეიქმნება სპეციალური ჯგუფი რომელიც საქართველოში არსებულ ვითარებაზე მოხსენებას მოამზადებს. ამასთან გაზაფხულის სესიაზე სტრასბურგში გაიმართება სპეციალური მოსმენა საქართველოს საარჩევნო კოდექსთან დაკავშირებით.

ამის პარალელურად „ნიუპოსტისთვის“ ვიზიტის დამატებითი დეტალები გახდა ცნობილი.

ოპოზიციამ საარჩევნო გარემოზე ინფორმაცია ევროპის სოციალისტური პარტის ლიდერებსაც მიაწოდა, სხვათაშორის ეს ის პარტიაა რომელშიც თავად "ქართული ოცნება" არის გაწევრიანებული.

როგორც ირკვევა სტარზბურგში დაგეგმილ შეხვედრას „ქართული ოცნებიდან“ ზვიად კვაჭანტირაძეც უნდა დასწრებოდა, თუმცა ჩვენი ინფორმაციით, უმრავლესობის ლიდერმა წინასწარ დაგეგმილი შეხვედრა გააუქმა და სასტუმრო „მერკურში“ ჯავშანი შაბათს მოხსნა.

„ნიუპოსტს“ აღნიშნული ინფორმაცია კახა კუკავამ დაუდასტურა. ინტერპარტიული ჯგუფის წევრი თვლის, რომ მმართველი ძალის წარმომადგენელი საარჩევნო სისტემის კრიტიკას გაექცა.

„ზვიად კვაჭანტირაძე არ ესწრებოდა საპარლამენტო ასამბლეას, მათ შორის არც იმ ფრაქციის სხდომას, რომლის წევრი თვითონ არის. ეს ფაქტი ბუნებრივია გასაკვირი აღმოჩნდა ავროსაბჭოს ერთ-ერთი წამყვანი პარტიისთვის და ბუნებრივია ჩვენთვისაც“- აღნიშნა კუკავამ.

არასაპარლამენტო ოპოზიციის წევრი აცხადებს, რომ სტრაზბურგში ხელისუფლება თავს არიდებს იმ შეხვედრებში მონაწილეობას, სადაც კრიტიკული აზრი შეიძლება დაფიქსირდეს.

„ევროსაბჭოში ყველამ გაიგო, რომ ჩვენი ოპონენტები ხელისუფლებიდან თავს არიდებდნენ ჩვენან დებატებს. ოცნებას რომ არგუმენტები ჰქონოდა ამ დისკუსიას თავს არ აარიდებდნენ“- უთხრა კუკავამ „ნიუპოსტს“.

მისი თქმით, ევროპელი ლიდერებისგან მათ მიიღეს დაპირება, რომ ქართულ ოცნებას ოპოზიციასთან საარჩევნო გარემოზე დისკუსიას აიძულებენ.

„ნიუპოსტი“ თავიად კვაჭანტირაძეს დაუკავშირდა. „ქართული ოცნების“ წევრმა აღნიშნა, რომ ევროსაბჭოში არც კი ჰქონია ვიზიტი დაგეგმილი.

„ან მიზანმიმართულ ტყუილთან გვაქვს საქმე, ან არცოდნასთან.

სტრასბურგში არანაირი სპეციალური ან წინასწარ შეთანხმებული შეხვედრა მე არ მქონია.

პირიქით, ევროპარლამენტის წარმომადგენელ სოციალისტებთან შეხვედრა სწორედ თბილისში მქონდა გასულ სამშაბათს და ოთხშაბათს. ისინი აქეთ, თბილისში იყვნენ ჩამოსულები და უპირველესად , სწორედ ამ მიზეზით საერთოდ არ წავსულვარ სტრასბურგში ამჯერად.

ასეთ ჭორებზე თუ ჰიპოთეზებზე სხვა კომენტარის გაკეთება ზედმეტად მიმაჩნია. ჩემთან პოლემიკის ხარჯზე პიარს არავის გავაკეთებინებ.

ამას გარდა, გასულ კვირაში სხვა პარტიული ამოცანებიც მქონდა და მათ შორის გარდაბნის არჩევნებისთვის მზადება ნამდვილად არ იყო ბოლო ადგილზე. ასე რომ, მოვრჩეთ მეზღაპრეობას“ - ამბობს უმრავლესობის ლიდერი.

დავით ჯაბაშვილი