"პრეზიდენტის მხარდაჭერა უპირობო არაა, თავად სასამართლო უნდა იყოს სამართლიანი"- კოჟორიძე

პოლიტიკა - 15:01, 02 Feb, 2016

1233

პრეზიდენტის მრჩევლის კახა კოჟორიძის თქმით, იმ ფონზე, როდესაც მოსამართლეთა კონფერენცია და იუსტიციის უმაღლესი საბჭო საქართველოს პრეზიდენტს მათ წინააღმდეგ წარმოებულ კამპანიაში ადანაშაულებს კონსტრუქციულ დიალოგზე საუბარი ნაკლებ რელევანტურია. კოჟორიძის განცხადებით პრეზიდენტი სასამართლოს დამოუკიდებლობის მხარდამჭერია, თუმცა ამ მხარდაჭერას თავისი პირობები აქვს და სასამართლო სისტემის მხრიდანაც მოითხოვს მიუკერძოებულობას, ანგარიშვალდებულებას:

„მაშინ როდესაც გუშინ მოსამართლეთა კონფერენციამ მიიღო განცხადება და დღეს ამას იუსტიციის უმაღლესი საბჭო შეუერთდა, სადაც ითქვა, რომ საქართველოს პრეზიდენტი არის საძრახის კამპანიაში ჩართული თურმე, რომ კამპანია აწარმოოს იუსტიციის საბჭოს წინააღმდეგ. ასეთი დამოკიდებულება, როცა არის და ასეთი განცხადებები კეთდება, არა მგონია, რომ ამის შემდეგ საბჭოს მხრიდან მთლად რელევანტური იყოს კონსტრუქციულ დიალოგზე საუბარი. საქართველოს პრეზიდენტი ყოველთვის უჭერდა, უჭერს და დაუჭერს მხარს საქართველოს სასამართლოს დამოუკიდებლობას, მიუკერძოებულობას, ანგარიშვალდებულებას. მაგრამ ეს არ არის უპირობო მხარდაჭერა. ეს მხარდაჭერა არის იმ შემთხვევაში და იმ პირობით, რომ თავად სასამართლო იყოს დამოუკიდებელი, სამართლიანი და ანგარიშვალდებული“ - განაცხადა კახა კოჟორიძემ