ინტერპარტიული ჯგუფის შეხვედრაზე საარჩევნო კოდექსის ცვლილების აუცილებლობაზე იმსჯელებენ

პოლიტიკა - 10:48, 02 Feb, 2016

834

ინტერპარტიული ჯგუფის წევრები დღეს საარჩევნო კოდექსის ცვლილების აუცილებლობაზე იმსჯელებენ და მათი წარმომადგენლების მიერ ვენეციის კომისიაში და ევროსაბჭოში გამართულ შეხვედრებს შეაჯამებენ.

„ახალი მემარჯვენეების“ თავმჯდომარის მამუკა კაციტაძის განცხადებით შეხვედრაზე საუბარი იქნება საარჩევნო კოდექსის ცვლილებებთან დაკავშირებით პარლამენტში მათ მიერ წარდგენილ ინიციატივაზე, ამასთანავე კაციტაძის თქმით საჭიროა, რომ პრემიერთან მომავალი შეხვედრის ფორმატი და თარიღი ჩაინიშნოს:

„საინტერესოა როდის ჩაინიშნება საკომიტეტო და პლენარულ სხდომაზე მოსმენა ჩვენი ინიციატივისა, რომელიც 200 ათასი ხელმოწერით არის გამაგრებული. პრემიერითან შეხვედრის შემდეგ ერთი კვირა გავიდა და ალბათ უკვე დროა მისი მხრიდან კონკრეტული ფორმატი და თარიღი ჩაინიშნოს მომავალი ურთიერთობისა, ამ თემაზეც გვექნება საუბარი.“- განაცხადა მამუკა კაციტაძემ.

„ეროვნულ დემოკრატიული პარტიის“ ლიდერის ბაჩუკი ქარდავას თქმით ინტერპარტიული ჯგუფი მოლოდინის რეჟიმშია და პრემიერის მხრიდან კონკრეტულ წინადადებებს მოელის:

„ვენეციის კომისიასთან ჩვენი წარმომადგენლების და პარტნიორების შეხვედრა საკმაოდ წარმატებული იყო, ასევე წარმატებული იყო შეხვედრები ევროსაბჭოში და ამ შეხვედრებს შევაჯამებთ, რაც შეეხება ძალიან მნიშვნელოვან თემას, პრემიერთან შეხვედრის შედეგებს, ვიტყოდი რომ არ ყოფილა არანაირი კონკრეტული წინადადება და შემოთავაზება, ჩვენ ვართ მოლოდინში“- აღნიშნა ბაჩუკი ქარდავამ.

შეხვედრაზე პაატა დავითაიასა და კახა კუკავასაც მოუსმენენ, რომლებიც სტრასბურგიდან დაბრუნდნენ. განიხილება ის საკითხებიც, რომელზეც თბილისში ინტერპარტიული ჯგუფისა და ვენეციის კომისიის წევრების შეხვედრის დროს უნდა ისაუბრონ. ვენეციის კომისიის წარმომადგენლები საქართველოში 15 თებერვალს ჩამოვლენ.