დაპირისპირება შიდა ქართლში - მაჟორიტარი დეპუტატის შემდეგ გუბერნატორს გორის გამგებელი უპირისპირდება

პოლიტიკა - 00:48, 02 Feb, 2016

2069

გორის მუნიციპალიტეტის გამგებელი მხარის გუბერნატორს უპირისპირდება, ამის შესახებ გორიდან ,,ნიუპოსტის“ კორესპონდნეტი იტყობინება. დავით ონიაშვილმა დღეს საგანგებო განცხადება გააკეთა და აღნიშნა, რომ რამოდენიმე დღის წინ გორის მაჟორიტარ დეპუტატ სოსო ვახტანგაშვილის მიერ გაკეთებულ განცხადებას იზიარებს. კერძოდ, ვახტანგაშვილმა ერთ-ერთი ტელევიზიის ეთერიდან გუბერნატორს გადადგომისაკენ მოუწოდა , მიზეზად კი გორში შექმნილი პოლიტიკური კრიზისი დაასახელა. პოლტიკურ კრიზისზე საუბრობს ონიაშვილიც, ის ერთ-ერთ მაგალითად გორის საკრებულოში პირველი პირების იმპიჩმენტის დაწყებას ასახელებს, თუმცა კონკრეტული განცხადებებისგან თავს იკავებს. ,,შექმნილი კრიზისული სიტუაცია ძირითადად არის სამხარეო ადმინისტრაციის პასუხიმგებლობის ქვეშ. ჩემი მხრიდან და გამგეობის მხრიდან, საქმიანობა არის ხალხის მსახურობაზე ორიენტირებული და ხშირად ყოფილა რომ ამ ორიენტირებისკენ ერთმანეთს არ დამთხვეულა ჩვენი პოზიციები"-განაცხადა გამგებელმა.

შიდა ქართლის გუბერნატორის ადმინისტრაციას გორის მუნიციპალიტეტის გამგებლის განცხადებაზე კომენტარი ჯერ არ გაუკეთებია. რაც შეეხება ვახტანგაშვილის მოწოდებას, გუბერნატორმა პარლამენტარს ასე უპასუხა. „არ ვაპირებ დეპუტატ სოსო ვახტანგაშვილის ბრალდებებზე ვრცელი განცხადების გაკეთებას. ყველასთვის ისედაც გასაგებია, რომ საარჩევნო წელს ადგილი ექნება დაუსაბუთებელ ბრალდებებს. მე, როგორც სახელმწიფო რწმუნებული შიდა ქართლში ვაგრძელებ ჩემს საქმიანობას და არანაირ პოლიტიკურ დებატებში შესვლას არ ვგეგმავ.”-განაცხადა ზურაბ რუსიშვილმა.