გორის საკრებულოს სათავეში ოქრუაშვილის და ალასანიას გუნდი მოდის

პოლიტიკა - 14:56, 01 Feb, 2016

4337

5 თებერვლის საკრებულოს სხდომას გორელები განსაკუთრებულად ელოდებიან, ამ დღეს უნდა გაირკვეს დამტკიცდება თუ არა 2016 წელს გორისთვის ყველაზე მნიშვნელოვანი ფინანსური დოკუმენტი, რომელიც უკვე ორჯერ ჩავარდა. 5 თებერვალს ასევე უნდა გაირკვეს დარჩებიან თუ არა მმართველი გუნდის წარმომადგენლები გორის საკრებულოს სათავეში. საკრებულოს თავმჯდომარეს, მის მოადგილეს და 4 კომისიის თავმჯდომარეს ოპოზიცია უნდობლობას უცხადებს. უკვე ცნობილია იმ პირების ვინაობაც, რომელებიც სავარაუდოთ პაპუნა კობერიძეს და ნინო ზურაბიშვილს ჩაანაცვლებენ. ,,ნიუპოსტის" ინფორმაციით საკრებულოს თავმჯდომარეობისთვის ყოფილი თავდაცვის მინისტრის ირაკლი ოქრუაშვილის პარტიის წარმომადგენელი ილია მეტრეველი ემზადება, ხოლო მოადგილის პოსტის დასაკავებლად ასევე ყოფილი თავდაცვის მინისტრის ირაკლი ალასანიას თანაგუნდელი თამარ თედლიაშვილი. აღნიშნულ ინფორმაციას მეტრეველი და თედლიაშვილი არც უარყოფენ და არც ადასტურებენ, მათი თქმით კონსულტაციები ჯერ კიდევ მიმდიანრეობს. საკრებულოს პირველი პირების უნდობლობის საკითხს ,,ქართული პარტია", ,,ნაციონალური მოძრაობა" და ,,თავისუფალი დემოკრატები" აყენებენ. სავარაუდოთ მათ შეუერთდება ცოტა ხნის წინ ,,ქართულ ოცნებას" გამიჯნული იოსებ ფალელაშვილი რომლის ხმა უნდობლობის გამოცხადებისთვის გადამწყვეტია. ამ ეტაპზე ფალელაშვილიც დუმილს ამჯობინებს და არ ამბობს აწევს თუ არა ხელს 5 თებერვალს ყოფილი თანაგუნდელების საწინააღმდეგოდ. გორის საკრებულო სულ 15 წევრისაგან შედგება, მმართველ ძალას 5 ხმა აქვს, ხოლო იმპიჩმენტების ინიციატორ ,,ქართულ პარტიას", "ნაციონალურ მოძრაობას" და ,,თავისუფალ დემოკრატებს" შვიდი. უნდობლობის გამოსაცხადებლად კი 8 ხმაა საჭირო, მერვე ხმა როგორც უკვე გითხარით ფრაქცია "ქართული ოცნების" ყოფილ თავმჯდომარეს იოსებ ფალელაშვილს ეკუთვნის, ,,ნიუპოსტის" ინფორმაციით ფალელაშვილი საკუთარი ხმის გამოყენებას ყოფილი თანაგუნდელების საწინააღმდეგოდ გეგმავს.