ჰააგის პროკურორის ფატუ ბენსუდას განცხადებით 2008 წლის რუსეთ-საქართველოს ომის გამოძიების დაწყების მიზეზი ის გახდა, რომ დანაშაული ადგილობრივ დონეზე არ არის გამოძიებული, სწორედ ამიტომ საქმეში საერთაშორისო სასამართლო ჩაერთო.

ბენსუდას განმარტებით, ჰააგის სასამართლოს იურისდიქციაში კაცობრიობის წინაშე ჩადენილი დანაშაულისა და გენოციდის გამოძიება შედის. ჰააგის პროკურორის თქმით, გამოძიებას მის მიერ დაკომპლექტებული გუნდი მიუკერძოებლად და დამოუკიდებლად ჩაატარებს.

"ჩვენ ახლახან მივიღეთ ნებართვა, რომ უნდა გამოვიძიოთ საქართველოს მთელ ტერიტორიაზე ჩადენილი დანაშაული. როგორც ჩემი ოფისი აფასებს, შესაძლო დანაშაულის ჩადენის მომენტში სამხრეთ ოსეთი იყო და არის საქართველოს ნაწილი. ამიტომ ჩვენ უნდა გამოვიძიოთ საქართველოში ჩადენილი დანაშაული, მათ შორის, სამხრეთ ოსეთში. ძალიან ადრეა იმის თქმა, რომ შევძლებთ ან ვერ შევძლებთ თანამშრომლობას სამხრეთ ოსეთის დე ფაქტო, ხაზგასმით ვამბობ, დე ფაქტო ხელისუფლებასთან, მაგრამ ახლავე შემიძლია გითხრათ, რომ მოთხოვნას გავაგზავნით“- განაცხადა ბენსუდამ.

ბენსუდა საქართველოში, ოკუპირებულ სამხრეთ ოსეთსა და რუსეთში გამოძიების მასალებისა და მტკიცებულებების მოსაპოვებლად ვიზიტს არ გამორიცხავს:

„კიდევ ერთხელ მოვუწოდებ კონფლიქტის ყველა მხარეს, რომ ითანამშრომლონ ჩემს ოფისთან, ეს არის საჭირო იმისთვის, რომ დავადგინოთ სიმართლე. გამოძიების წინასწარ ეტაპზე ჩვენ მივიღეთ მასალები როგორც საქართველოდან, ასევე, სხვათა შორის, რუსეთიდან. მათ ნამდვილად გამოგვიგზავნეს დოკუმენტები და მჭიდროდ ითანამშრომლეს, ისევე, როგორც საქართველომ. მე ამ მომენტისთვის ვიტყოდი, რომ მჯერა, მწამს, იმედი მაქვს, რომ ასე გაგრძელდება, რადგან წამოვიდნენ კონტაქტზე და ჯერ ვერ ვიტყვი, რომ ხელს გვიშლიან. წინასწარი გამოძიების დროსაც არ იყო რუსეთი რომის სტატუტის წევრი, მაგრამ ჩვენთან ითანამშრომლეს".

ფატუ ბენსუდა განმარტავს, რომ საერთაშორისო სასამართლოს მანდატი ქვეყნებს შორის დავის გამოძიებას არ ითვალისწინებს და ის სისხლის სამართლის კონკრეტულ დანაშაულებში პასუხისმგებელი პირების დადგენას ისახავს მიზნად. პროკურორი იმედოვნებს, რომ დეფაქტო ხელისუფლება გამოძიებასთან ითანამშრომლებს. ფატუ ბენსუდა გამოძიების დასრულების თარიღს ვერ ასახებს და აცხადებს, რომ ეს ფაქტების შესწავლის მსვლელობაზეა დამოკიდებული:

"ჩვენს იურისდიქციაში შედის კაცობირობის წინაშე ჩადენილი დანაშაული, ომის დანაშაული და გენოციდი. ოფისი გამოიძიებს, მაგალითად, სამშვიდობოების მკვლელობის ფაქტებს. გვაქვს ინფორმაცია, რომ მშვიდობისმყოფელებზე შეტევა იყო ორივე - როგორც რუსეთის, ასევე საქართველოს მხრიდან. ამის შესახებ ვაპირებთ, რომ ინფორმაცია მოვიძიოთ... ჰააგის სასამართლო ქვეყნებს შორის დავის გარკვევით არ არის დაკავებული. ჩვენი მანდატი არ არის საუბარი თუნდაც ტერიტორიულ საზღვრებზე და ა.შ. ეს არ არის ჩვენი საქმე. ჩვენი მიზანია, მოვძებნოთ ჩადენილ სისხლის სამართლის ყოველ კონკრეტულ დანაშაულზე პასუხისმგებელი პირები, ამიტომ არის საჭირო მყარი მტკიცებულებები, რომ სწორი გადაწყვეტილება მივიღოთ და გამოვავლინოთ პასუხისმგებელი პირები, ვინც უნდა აგოს პასუხი. მხოლოდ მტკიცებულებები მიგვიყვანს ინდივიდუალურ პირებამდე. ამ პირებზე მოვითხოვთ დაპატიმრების ორდერის გაცემას. ეს შეიძლება იყოს ერთი პირი ან ერთზე მეტი".- აღნიშნა ბენსუდამ „მოამბესთან" ექსკლუზიურ ინტერვიუში