ხიდაშელის უწყებამ სამხედროების მიერ სექსუალურ ძალადობის ფაქტზე გამოძიება გაეროს ოფიციალური განცხადებამდე დაიწყო

პოლიტიკა - 20:22, 30 Jan, 2016

1431

საქართველოს თავდაცვის მინისტრის განცხადებით თავდაცვის უწყებას ოფიციალურ განცხადებამდე ერთი კვირით ადრე ქონდა კონფიდენციალური ინფორმაცია, რომ გაეროს კომისარიატი ცენტრალური აფრიკის რესპუბლიკაში არასრულწლოვანებზე სექსუალური ძალადობის შესახებ ინფორმაიის გამოქვეყნებას გეგმავდა, აღნიშნული განცხადება თავდაცვის უწყების ხელმძღვანელმა "ქრონიკის" ეთერში გააკეთა:

„მე გამოძიების ბრძანება გავეცი მაშინვე როდესაც ჩვენ მივიღეთ პირველი შეტყობინება ეს იყო გასული კვირის ოთხშაბათს, დაახლოებით ერთი კვირა არის რაც გამოძიება დაწყებულია. ჩვენ არ დავლოდებივართ ოფიციალური განცხადების გაკეთებას და პირველივე შეტყობინების მიღებიდანვე დავავალე სამხედრო პოლიციას გამოძიებას. გამოძიება დროს მოითხოვს, რადგან დანაშაულის სავარაუდო ადგილი არ არის ჩვენ ქვეყანაში და ჯგუფი გაემგზავრება ცენტრალურ აფრიკაში, რაც გარკვეულ პროცედურებს ითვალისწინებს“- განაცხადა თინათინ ხიდაშელმა.

შეგახსენებთ, გაეროს ადამიანის უფლებათა უმაღლესი კომისარიატის ინფორმაციით, ცენტრალური აფრიკის რესპუბლიკაში ქართველმა სამხედროებმა მცირეწლოვანი გოგონების წინააღმდეგ სექსუალური ძალადობა განახორციელეს.

როგორც კომისარიატის ოფიციალურ ვებ-გვერდზე განთავსებულ ინფორმაციაშია ნათქვამი, უმაღლესი კომისარი ადამიანის უფლებათა საკითხში ზეიდ რაად ალ ჰუსეინი შეშფოთებულია იმ ბრალდებების გამო, რომელიც ცენტრალური აფრიკის რესპუბლიკაში არასრულწლოვან გოგონებზე უცხო ქვეყნის სამხედრო პირების მიერ სექსუალურ ძალადობას ეხება.