აშშ ამაყობს, საქართველოს შეიარაღებულ ძალების პარტნიორია- იან კელი

პოლიტიკა - 22:17, 29 Jan, 2016

1386

გაეროს კომისარიატის მიერ ცენტრალურ აფრიკაში მყოფ ქართველ სამხედროებთან დაკავშირებით გავრცელებულ ინფორმაციას ამერიკის შეერთებული შტატების ელჩი საქართველოში იან კელი გამოეხმაურა. ელჩის თქმით აშშ ამაყობს რომ საქართველოს შეიარაღებული ძალები მისი პარტნიორია, ამასთანავე იან კელის თქმით მნიშვნელოვანია, რომ საქართველოს თავდაცვის სამინისტრო ამ საკითხს სერიოზულად მოეკიდა და ბრალდებების გამოძიება დაიწყო:

„ვნახეთ ცნობები პრესაში. კმაყოფილნი ვართ, რომ თავდაცვის სამინისტრო საკითხს სერიოზულად მოეკიდა და გაეროს ადამიანის უფლებათა უმაღლესი კომისრის ბრალდებების გამოძიება დაიწყო. აშშ ამაყობს, რომ უთვალავ სამშვიდობო მისიაში საქართველოს შეიარაღებულ ძალების პარტნიორია. სამწუხარო იქნებოდა, ამ ბრალდებებს ქართული ჯარის ამაყი რეპუტაცია შეელახა.“- აღნიშნულია ელჩის განცხადებაში.

შეგახსენებთ, გაეროს ადამიანის უფლებათა უმაღლესი კომისარიატის ინფორმაციით, ცენტრალური აფრიკის რესპუბლიკაში ქართველმა სამხედროებმა მცირეწლოვანი გოგონების წინააღმდეგ სექსუალური ძალადობა განახორციელეს.

როგორც კომისარიატის ოფიციალურ ვებ-გვერდზე განთავსებულ ინფორმაციაშია ნათქვამი, უმაღლესი კომისარი ადამიანის უფლებათა საკითხში ზეიდ რაად ალ ჰუსეინი შეშფოთებულია იმ ბრალდებების გამო, რომელიც ცენტრალური აფრიკის რესპუბლიკაში არასრულწლოვან გოგონებზე უცხო ქვეყნის სამხედრო პირების მიერ სექსუალურ ძალადობას ეხება.