„ასეთი სახის ინფორმაცია ჩემთან არ მოსულა"- სამხედრო წარმომადგენელი ცენტრალური აფრიკის რესპუბლიკაში გაეროს ანგარიშს გამოეხმაურა

პოლიტიკა - 16:27, 29 Jan, 2016

1845

ცენტრალურ აფრიკაში სამხედროების მიერ არასრულწლოვან გოგონებზე სექსუალური ძალადობის განხორციელების შესახებ, გაეროს ადამიანის უფლებათა დაცვის კომისრის მიერ გავრცელებულ ინფორმაციას, ცენტრალური აფრიკის რესპუბლიკაში საქართველოს სამხერო წარმომადგენელი ვიცე-პოლკოვნიკი ლევან ბუაძე გამოეხმაურა. მისი თქმით ქართველ სამხედროებთან დაკავშირებით ადგილობრივ მოსახლეობას პრეტენზიები არ ქონია და მასთან საჩივრით არავინ მისულა:

„არავითარი ასეთი სახის ინფორმაცია ჩემთან არ მოსულა, არავითარ ჩივილს ადგილი არ ქონია, პირიქით, ვიცი, რომ ისინი ძალიან კარგად იყვნენ ჩვენს მიმართ განწყობილი. ჩვენი სამსახურის მისიიდან გამომდინარე ისეთ ადგილებზე იყო განლაგებული ჩვენი დაცვის ქვეშ მყოფი პოსტები, რომ ხშირად ადგილი ქონდა მოსახლეობის ჯარისკაცებთან ახლოს მოსვლას, თუმცა ახლო ურთიერთობაში არ ვყოფილვართ. მე აღნიშნულ ფაქტზე კომენტარს ვერ გავაკეთებ. მიმდინარეობს გამოძიება“- განაცხადა ბუაძემ „კურიერთან“ საუბარში.

შეგახსენებთ, გაეროს ადამიანის უფლებათა უმაღლესი კომისარიატის ინფორმაციით, ცენტრალური აფრიკის რესპუბლიკაში ქართველმა სამხედროებმა მცირეწლოვანი გოგონების წინააღმდეგ სექსუალური ძალადობა განახორციელეს.
როგორც კომისარიატის ოფიციალურ ვებ-გვერდზე განთავსებულ ინფორმაციაშია ნათქვამი, უმაღლესი კომისარი ადამიანის უფლებათა საკითხში ზეიდ რაად ალ ჰუსეინი შეშფოთებულია იმ ბრალდებების გამო, რომელიც ცენტრალური აფრიკის რესპუბლიკაში არასრულწლოვან გოგონებზე უცხო ქვეყნის სამხედრო პირების მიერ სექსუალურ ძალადობას ეხება.