გაეროს ადამიანის უფლებათა უმაღლესი კომისარიატის ინფორმაციით, ცენტრალური აფრიკის რესპუბლიკაში ქართველმა სამხედროებმა მცირეწლოვანი გოგონების წინააღმდეგ სექსუალური ძალადობა განახორციელეს.
როგორც კომისარიატის ოფიციალურ ვებ-გვერდზე განთავსებულ ინფორმაციაშია ნათქვამი, უმაღლესი კომისარი ადამიანის უფლებათა საკითხში ზეიდ რაად ალ ჰუსეინი შეშფოთებულია იმ ბრალდებების გამო, რომელიც ცენტრალური აფრიკის რესპუბლიკაში არასრულწლოვან გოგონებზე უცხო ქვეყნის სამხედრო პირების მიერ სექსუალურ ძალადობას ეხება.

დოკუმენტის თანახმად, აღნიშნული ბრალდება ქართველ სამხედროებსაც ეხება.

გაერო-ს წარმომადგენლებმა ცენტრალური აფრიკის რესპუბლიკაში არაერთ გოგონასთან ჩაწერეს ინტერვიუ, რომლებიც ამბობენ, რომ ისინი უცხოელი ჯარისკაცების მხრიდან სექსუალური ექსპლუატაციის მსხვერპლნი არიან.
"ოთხმა გოგონამ ინტერვიუს დროს განაცხადა, რომ ისინი ევროკავშირის მისიის ფარგლებში მყოფმა სამხედროებმა გააუპატიურეს. კიდევ ორმა გოგონამ კი განაცხადა, რომ მათ სექსუალური კავშირის სანაცვლოდ სხვა მისიის სამხედროებმა ფული გადაუხადეს. სამხედროების ნაწილის ეროვნება უცნობია, სამი გოგონას აზრით კი, მათზე ძალადობა მისიის ქართული კონტიგენტის სამხედროებმა განახორციელეს. 4 გოგოს ასაკი სავარაუდოდ 14-იდან 16 წლამდე მერყეობს" - აღნიშნულია ინფორმაციაში.

გაეროს წარმომადგენლები ასევე იმ ბავშვებსაც ესაუბნენ, რომელთა მიმართაც 2014 წელს განხორციელებული ძალადობა ფრანგ ჯარისკაცებს ედებათ ბრალად.

7 წლის გოგონას თქმით, ერთი ბოთლი წყლისა და ნამცხვრის სანაცვლოდ ჯარისკაცებმა მას ორალური სექსი მოსთხოვეს, რაც შეასრულა. იგივე განაცხადა 9 წლის ბიჭმაც. მათი თქმით, ფრანგი ჯარისკაცები აღნიშნულ ქმედებად სხვა ბავშვების მიმართაც მიმართავდნენ.

როგორც გაეროს დოკუმენტშია ნათქვამი, აღნიშნული ბრალდებების გამო გაეროს უმაღლესმა კომისარმა საფრანგეთის, საქართველოსა და ევროპის კიდევ ორი ქვეყნის ხელისუფლებას აღნიშნული ბრალდების გამოძიებაში თანამშრომლობისთვის მიმართა.

„ოთხივე ქვეყნის ხელისუფლება ოპერატიულად გამოეხამურა კომისრის განცხადებას და აღნიშნეს, რომ საკუთარ ქვეყნებში გამოძიება უკვე დაწყებულია“ - ნათქვამია განცხადებაში.