ყველაფერი, რაც შეეხება სამხედროებს, პრეზიდენტთან ერთად უნდა იყოს გადაწყვეტილი

ყველაფერი, რაც შეეხება სამხედროებს, პრეზიდენტთან ერთად უნდა იყოს გადაწყვეტილი - ხიდაშელი

პოლიტიკა - 12:55, 29 Jan, 2016

1177

საქართველოს თავდაცვის მინისტრის თინა ხიდაშელის განცხადებით, თებერვალში დაგეგმილი ნატო-ს თავდაცვის მინისტერიალის ფარგლებში, ალიანსის წევრი ქვეყნების მინისტრების ვახშამზე საქართველო პირველად არის მიწვეული.

"ეს არის ერთ-ერთი ოფიციალური ფორმატი, სადაც ჩვენ არასოდეს მიწვეული არ ვყოფილვართ, არცერთი არაწევრი ქვეყანა მიწვეული არ ყოფილა. ეს არის ერთ-ერთი ჟესტი იმის, რომ მათიანი ხარ და ასეთ არაფორმალურ ღონისძიებებზეც კი, სადაც ძირითადი საკითხები თანხმდება, უკვე მოგვცეს შესაძლებლობა, რომ მონაწილეობა მივიღოთ. ბევრი ასეთი რამ ხდება ნატო-საქართველოს ურთიერთობაში, რომელიც შეიძლება, ერთი შეხედვით პატარა და უმნიშვნელო ჩანს, მაგრამ მუდმივმოქმედ რეჟიმში ადასტურებს იმას, რომ მათიანი ხარ და ის პარტნიორი ხარ, რომელსაც შიდა დისკუსიებშიც კი აღებინებენ მონაწილეობას" - განაცხადა ხიდაშელმა.დღესვე ცნობილი გახდა, რომ მინისტერიალის ფარგლებში ნატო-საქართველოს კომისიის სხდომა გაიმართება.

მინისტრმა ჟურნალისტებთან საუბრისას საქართველოს საერთაშორისო მისიების მუშაობაში რამდენიმე ტექნიკური ცვლილების განხორციელების შესაძლებლობაზეც გაამახვილა ყურადღება.
ხიდაშელის თქმით, მისიებთან დაკავშირებულ საკითხს დღეს უშიშროების საბჭოს სხდომაზე განიხილავენ.

"ყველაფერი, რაც შეეხება სამხედროებს, პრეზიდენტთან ერთად უნდა იყოს გადაწყვეტილი და ამიტომ არის უშიშროების საბჭოს ფორმატში ამაზე საუბარი მნიშვნელოვანი", - განაცხადა ხიდაშელმა.

"მისიებთან დაკავშირებით გადაწყვეტილების რამდენიმე ვერსია გვაქვს. პატარა ცვლილებები გვინდა გავაკეთოთ იმისთვის, რომ სამხედრო მოსამსახურეები უფრო უკეთესად გრძნობდნენ იქ თავს. თავად მისიების მანდატი განსაზღვრულია ქვეყნის პარლამენტის მიერ. ყველგან ჩვენს პარტნიორ ქვეყნებში ახლა მიმდინარეობს ამ მანდატების გადახედვა. მოგეხსენებათ, თებერვალში არის ნატო-ს თავდაცვის მინისტერიალი, სადაც ერთ-ერთი თემა სწორედ RSM იქნება, მისია რომლითაც ჩვენ ვმონაწილეობთ ავღანეთში და უშიშროების საბჭოს უნდა მოვახსენო ყველა იმ დისკუსიების შესახებ, რომელიც მიმდინარეობს. ჩვენ გაცხადებული გვაქვს მრავალი წელია, რომ ავღანეთში ვრჩებით ჩვენს პარტნიორებთან ერთად მისიის დამთავრებამდე. ეს რას ნიშნავს, სწორედ ამის შესახებ არის დღეს ნატო-ში დისკუსია და ამის შესახებ იქნება ჩემი მოხსენება უშიშროების საბჭოზე... ჩვენთვის მთავარი ამოცანაა შესაძლებობის ფარგლებში აბსოლუტური სინქრონიზაცია მოვახდინოთ ქმედებების. მთავრობაში ჩვენ პრაქტიკულად ყველაფერზე შეთანხმებული ვართ, თავდაცვის სამინისტრო, საგარეო საქმეთა სამინისტრო და დავით ბაქრაძის უწყება სრული სინქრონიზაციით, ერთიანი გეგმის ფარგლებში ვმოქმედებთ. უშიშროების საბჭოში, მოგეხსენებათ, მთავრობის წევრების გარდა არიან პარლამენტის წარმომადგენლები და რა თქმა უნდა, თავად ქვეყნის პრეზიდენტი. ჩვენ გვინდა, რომ მათ გავაცნოთ ის გეგმა და სამოქმედო სტრატეგია, რომელიც მთავრობაში გვაქვს მიღებული იმისთვის, რომ მთავარი ინტერესი არ დაზიანდეს და ყველამ ერთი და იგივე სამოქმედო გეგმით ერთიანად გაწერილი სისტემით ვიმუშავოთ მთავარი მიზნისთვის, რომ ვარშავის სამიტის შემდეგ საქართველოს თავდაცვისუნარიანობა უფრო მეტად იყოს დაცული, ვიდრე დღეს არის", - განაცხადა თინა ხიდაშელმა.