"უფლებადამცველების დაცვის კუთხით საქართველოში ვითარების გაუარესების საგანგაშო ნიშნებია"- ევროსაბჭო

პოლიტიკა - 11:45, 29 Jan, 2016

1475

საქართველო ევროსაბჭოს საპარლამენტო ასამბლეის კიდევ ერთ კრიტიკულ რეზოლუციაში საქართველოც მოხვდა.დოკუმენტში ნათქვამია, რომ უფლებადამცველების დაცვის კუთხით საქართველოში ვითარების გაუარესების ნიშნებია.

რეზოლუციაში, რომელიც წევრ ქვეყნებში უფლებადამცველი პირებისა და ორგანიზაციების საქმიანობას ეხება, განსაკუთრებული აქცენტი რუსეთზე, თურქეთსა და აზერბაიჯანზეა გაკეთებული.
"ასამბლეა რეზოლუციაში აღნიშნავს, რომ ევროსაბჭოს ქვეყნების უმრავლესობაში ადამიანის უფლებების დამცველები თავისუფლად მუშაობენ თავიანთი საქმიაობის ხელისშემწყობ გარემოში. მიუხედავად ამისა, ღრმად შემაშფოთებელია, რომ გარკვეულ წევრ ქვეყნებში უფლებადამცველებს რეპრესიები ხვდებათ, აზერბაიჯანის, რუსეთის და თურქეთის ჩათვლით. რამდენიმე ქვეყანაში სიტუაციის გაუარესების საგანგაშო ნიშნებია, საქართველოს ჩათვლით. კერძოდ, უფლებადამცველებზე საჯარო თავდასხმები, მუქარა, რომ გაავრცელებენ კომპრომატებს მათ წინააღმდეგ, ასევე ადვოკატებზე ფიზიკური თავდასხმები, მათი დაშინება და ზეწოლა, იმ ადვოკატების ჩათვლით, რომლებიც პოლიტიკურად სენსიტიურ საქმეებზე მუშაობენ" - ნათქვამია რეზოლუციაში.

ასამბლეა მოუწოდებს წევრ ქვეყნებს, თავი შეიკავონ ადამიანის უფლებების დამცველების დაშინებისა და რეპრესიებისგან, კერძოდ, მათზე თავდასხმების, უკანონო დაპატიმრებების და მათი სასამართლო თუ ადმინისტრაციული შევიწროვებისგან.