,,თავისუფალი დემოკრატების“ ეკონომიკური გზავნილები - პარტიამ ,,მოქალაქის“ ხმის მეორე ფაზა დაიწყო

პოლიტიკა - 14:01, 27 Jan, 2016

1011

დღეს, ‘’თავისუფალმა დემოკრატებმა’’ კამპანია ‘’მოქალაქის ხმის‘’ მეორე ფაზა დაიწყეს, რომლის ფარგლებშიც პარტიის პროგრამის ეკონომიკური ხედვის ძირითადი გზავნილები გლდანში, ახმეტელის მეტროს მიმდებარე ტერიტორიაზე, მცირე ბიზნესის წარმომადგენლებს, მოვაჭრეებს და მოსახლეობას გააცნეს. ლიდერებმა მათ მცირე და მიკრო ბიზნესის განვითარებისთვის ახალი წინადადებები წარუდგინეს. ‘’თავისუფალი დემოკრატების’’ მთავარი გზავნილებია:

1. მიკრო ბიზნესის სტატუსი მიენიჭება ფიზიკურ პირებს, რომელთა ერთობლივი შემოსავალი კალენდარული წლის განმავლობაში არ აღემატება 50 000 ლარს. (30,000 ლარის ნაცვლად).

2. ფიქსირებული გადასახადის აქტიურად გამოყენება და მისი არეალის გაფართოება.

3. “ფინანსური პოლიციის” გაუქმება და საგამოძიები ფუნქციის განხორციელება, მხოლოდ საგადასახადო შემოწმების დასკვნის საფუძველზე.

4. ეკონომიკური დანაშაულის დეკრიმინალიზაცია.

5. გადასახადის შეცდომით არასწორად გადახდის დეკრიმინალიზაცია.

6. შემოსავლების სამსახურის მიერ საბანკო ანგარიშების გაყინვა/დაყადაღების დაუშვებლობა სასამართლო გადაწყვეტილებების გარეშე.

7. მხოლოდ განაწილებული მოგების დაბეგვრა, გაუნაწილებელი არ დაიბეგრება.

კამპანია ‘’მოქალაქის ხმა‘’ თბილისის ყველა უბანში გაგრძელდება. ‘’თავისუფალი დემოკრატების’’ ლიდერები ქვეყნის განვითარების ხედვის სხვადასხვა მიმართულებებს მოსახლეობას სხვადასხვა უბნებში პირადად გააცნობენ.