ევროსაბჭოში საქართველოს დელეგაციის ხელმძღვანელი თედო ჯაფარიძე გიგი უგულავასთან დაკავშირებით პედრო აგრამუნტის განცხადებას გამოეხმაურა.

როგორც სიტყვით გამოსლისას ჯაფარიძემ აღნიშნა, უგულავა სასჯელს კონკრეტული დანაშაულისთვის იხდის. მისი განცხადებით, არც მას უხარია, რომ უგულავა ციხეშია, მაგრამ საქართველოში კანონზე მაღლა ვერავინ დადგება.

„პრეზიდენტმა აგრამუნტმა თავისი გამოსვლისას, ერთი ქართული სახელი ახსენა და ის პოლიტ პატიმრად შეაფსა. ეს ადამიანი საქართველოში დამნაშავედ სცნეს ბიუჯეტიდან თანხის არამიზნობრივ გამოყენებაში. გაინტერესებთ, მიხარია თუ არა, რომ ეს ადამიანი ციხეშია? რა თქმა უნდა, არა, მაგრამ საქართველოში კანონზე მაღლა არავინ დგას, რადგან საქართველო არ არის ხელწამოსარტყავი ბიჭი, რომელსაც ხელს ნებისმიერი წამოარტყამს. ჩვენ ვართ დამოუკიდებელი სუვერენული სახელმწიფო. ეს მნიშვნელოვანია ყოველთვის, მაგრამ არჩევნების წელს განსაკუთრებით. ევროსაბჭოს საპარლამენტო ასამბლეამ ხელი უნდა შეუწყოს საქართველოს დემოკრატიულ კონსოლიდაციას“, - განაცხადა ჯაფარიძემ.