დავით ონოფრიშვილი GDS-ისგან ახსნა-განმარტებას ითხოვს

პოლიტიკა - 18:35, 25 Jan, 2016

3330

"თავისუფალი დემოკრატების" წევრი დავით ონოფრიშვილი ტელეკომპნანია GDS-ის გადაცემა "59 წამის" პროდიუსერებისგან ახსნა-განმარტებას ითხოვს. დეპუტატი ეჭვობს, რომ გადაცემის პროდიუსერებმა შემოსული ზარების რეალური მაჩვენებლი შეცვალეს.

"პროცენტული მაჩვენებელი იცვლებოდა არარეალურად. ჩემი რეიტინგი ძალიან სწრაფად და საეჭვოდ დაეცა. არ მგონია, ასეთი მანიპულაციებით "ჯიდიესმა" პოპულარობა მოიპოვოს, მითუმეტეს პოლიტიკურ გადაცემებში. მეც და ძალიან ბევრ ადამიანს დაგვრჩა შთაბეჭდილება და გონივრული ეჭვი, ხდებოდა ხელოვნური მანიპულირება ამ ინტერაქტივის. ეს არ არის ღირსეული საქციელი იმ ტელევიზიისგან, რომელსაც პრეტენზია აქვს, რომ მას ტელევიზია დაუძახონ. კარგი იქნება თუ, გადაცემის ხელმძღვანელობა ან წარმომადგენლობა გააკეთებს განცხადებას. როგორ ითვლებოდა რეიტინგი" - განაცხადა დეპუტატმა "ნიუპოსტს."

ონოფრიშვილს ეჭვი ეპარება იმაშიც, რომ ინტერაქტივში 23 ათასმა ადამიანმა მიიღო მონაწილეობა. მისი ინფორმაციით, "59 წამს" 6-7 ათასი მონაწილე ჰყავს.

"თავისუფალი-დემოკრატების" წევრი იმედს გამოთქვამს, რომ ამ გადაცემას მონიტორინგს მედია-ექსპერტებიც გაუწევენ.

"საინტერესო იქნება მათი აზრიც. ისინი სპეციალისტები არიან და შეუძლიათ თავიანთი მოსაზრება გამოთქვან” - დასძინა დეპუტატმა.

გუშინ, გადაცემა „59 წამის“ ერთ-ერთი სტუმარი დავით ონოფრიშვილი იყო. მისი რეიტინგი ინტერაქტივის შედეგების მიხედვით 52% იყო, მოგვიანებით მაჩვენებლი 12%-ით შეიცვალა. როგორც სოციალურ ქსელში აღნიშნავდნენ, გადაცემის პროდიუსერებმა შემოსული ზარების მაჩვენებელი შეცვალეს.

დავით ონოფრიშვილი „ჯიდიესისგან“ ახსნა-განმარტებას ითხოვს.