იუსტიციის მინისტრის თეა წულუკიანის თქმით, გარდაბანში 28 იანვარს დაგეგმილ არჩევნებზე სპეცუბნების გაუქმება ფიზიკურად შეუძლებელია, რადგან ამ დროში შესაბამისი კანონის მიღება ვერ მოხერხდება.

ამის შესახებ წულუკიანმა ჟურნალისტებთან საუბრისას განაცხადა.

„შემოდგომაზე ჩასატარებელ არჩევნებზე უკვე არცერთ სამინისტროს, მათ შორის არც თავდაცვის სამინისტროს, აღარ ექნება უფლება თავისი შეხედულებისამებრ შექმნას სპეცუბნები. უფრო მეტიც თავდაცვის სამინისტროს მოსაზრება იყო, რომ საერთოდ არ შექიმნას სამხედრო ბატალიონებში თუ სხვა ნაწილებში სპეცუბნები. ეს რეფორმა კანონში ცვილებების სახით არის წარმოდგენილი. მას პარლამენტში კენჭისყრა სჭირდება, რაც შეეხება გარდაბანს, იქ არჩევნები რამდენიმე დღეშია, ამიტომ ამ კანონის მიღება ვერ ესწრება“, - განაცხადა წულუკიანმა.

საარჩევნო სპეცუბნების გაუქმების შესახებ პოლიტიკური გადაწყვეტილება მიღებულია. ამის შესახებ საქართველოს პრემიერ-მინისტრმა გიორგი კვირიკაშვილმა მთავრობის ადმინისტრაციაში, არასაპარლამენტო ოპოზიციის ინტერპარტიულ ჯგუფთან შეხვედრისას განაცხადა.