წულუკიანი ინტერპარტიულ ჯგუფსა და პრემიერს შორის დაწყებულ დიალოგს დადებითად აფასებს

პოლიტიკა - 15:34, 25 Jan, 2016

1318

იუსტიციის მინისტრის შეფასებით ინტერპარტიულ ჯგუფთან საინტერესეო შეხვედრა შედგა და ამ პროცესის გაგრძელების შემთხვევაში მთავრობას საშუალება ექნება აზრთა გაცვლა-გამოცვლის რეჟიმში იყოს , რის შედეგადაც ქვეყნისთვის მნიშვნელოვანი გადაწყვეტილებების მიღება მოხდება. ამასთანავე წულუკიანის თქმით ინტერპარტიული ჯგუფის მოთხოვნასთან დაკავშირებით, რაც მაჟორიტარული სისტემის 2016 წლის არჩევნებისთვის გაუქმებას გულისხმობს, გადაწყვეტილება დღევანდელ შეხვედრაზე ვერ იქნებოდა მიღებული, თუმცა მთავრობის მხრიდან ამ საკითხის მონიშვნა მოხდა და პრემიერისგან წამოვიდა დაპირება, რომ ის მმართველი კოალიციის ფარგლებში, გუნდურ რეჟიმში მიიღებს გადაწყვეტილებას:

„ინტერპარტიულმა ჯგუფმა პრემიერ-მინისტრის წინაშე დააყენა მოთხოვნა, რომ მაჟორიტარული სისტემა არა 2020 წლისთვის, არამედ 2016 წლისთვის გაუქმდეს. ამ თემაზე დღეს გადაწყვეტილება მიღებული არ ყოფილა და ვერც იქნებოდა. ჩვენ ეს საკითხი მოვინიშნეთ. როგორც ერთ, ისე მეორე მოდელს აქვს თავისი დადებითი და უარყოფითი მხარეები და პრემიერ-მინისტრის მხრიდან დაპირება იყო, რომ ის გუნდურ რეჟიმში, მმართველი კოალიციის ფარგლებში მიიღებს გადაწყვეტილებას. პრემიერის გადაწყვეტილებაა, რომ შეიქმნას დიალოგის ფორმატი, რომელიც ერთი მხრივ, ინტერპარტიულ ჯგუფს და მეორე მხრივ, პრემიერს და მთავრობას საშუალებას მოგვცემს, რომ ვიყოთ მუდმივად აზრთა გაცვლა-გამოცვლის რეჟიმში, რის შედეგადაც საარჩევნო პროცესში სხვადასხვა საინტერესო და ქვეყნისთვის მნიშვნელოვან თემებზე მიღებულ იქნება გადაწყვეტილებები. ეს შეთანხმება შედგა და ალბათ, პრემიერ-მინისტრის გრაფიკის მიხედვით ჯგუფის შეხვედრაც უახლოეს მომავალში დაიგეგმება“- განაცხადა იუსტიციის მინისტრმა.