მედიის კრიტიკა სახიფათო საქმეა - რას ამბობს ოპერის სკანდალზე კულტურის მინისტრი

პოლიტიკა - 12:55, 23 Jan, 2016

1900

კულტურისა და ძეგლთა დაცვის მინისტრი, მიხეილ გიორგაძე ამბობს, რომ გარკვეულ ღონისძიებაზე მოსაწვევებით ადამიანების დაპატიჟება მთელ მსოფლიოში მიღებული პრაქტიკაა.
როგორც მან 30 იანვარს თბილისის ზაქარია ფალიაშვილის სახელობის ოპერისა და ბალეტის თეატრის საზეიმო გახსნაზე მოსაწვევებით დასწრებასთან დაკავშირებით არსებული უკმაყოფილების შეფასებისას აღნიშნა, აჟიოტაჟი ამ საკითხთან დაკავშირებით ხელოვნურია.
" კარგად ვიცი, რომ მედიის კრიტიკა სახიფათო საქმეა. ამას არ ვაპირებ, თუმცა გაკვირვებას ვერ დავმალავ იმასთან დაკავშირებით, რომ აჟიოტაჟი ამ საკითხთან დაკავშირებით ცოტა ხელოვნურად იყო შექმნილი. ის რომ გარკვეულ ღონისძიებებზე მოსაწვევებით პატიჟებენ ადამიანებს, ეს მსოფლიოში მიღებული პრაქტიკაა. სწორედ იმიტომ, რომ ეს ინტერესი მოსალოდნელი იყო საზოგადოებაში, რამდენიმე საპრემიერო დღეა როგორც ოპერის, ისე ბალეტის ნაწილში. " - განაცხადა გიორგაძემ.

საზოგადოების მხრიდან მკვეთრად ნეგატიური შეფასება მოჰყვა იმ ფაქტს, რომ 30 იანვარს თბილისის ოპერისა და ბალეტის განახლებული შენობის გახსნაზე დასწრებას მხოლოდ მიწვეული პირები შეძლებენ.

როგორც ირკვევა, რეაბილიტირებული შენობის გახსნაზე მხოლოდ თეატრის, მთავრობის, საპატრიარქოსა და ქართუ ჯგუფის წარმომადგენლები იქნებიან წარმოდგენილნი.

თბილისის ოპერის სამხატვრო ხელმძღვანელის დავით კინწურაშვილის განცხადებით, თბილისის ოპერისა და ბალეტის ადმინისტრაციამ ქცენტი "საზოგადო მოღვაწეებზე" გააკეთა.