პარლამენტის საფინანსო-საბიუჯეტო კომიტეტის თავმჯდომარის მოადგილე ლევან ებანოიძე ლარის გაუფასურებაში განსაკუთრებულს ვერაფერს ხედავს.

როგორც გადაცემა „პრიორიტეტებში“ სტუმრობისას ებანოიძემ განაცხადა, იგივე მდგომარეობაა მეზობელ ქვეყნებში და ამაზე გავლენა რეგიონში მიმდინარეო მოვლენებმა იქონია.

„ლარის გაუფასურებასთან დაკავშირებით განსაკუთრებული არაფერი არ ხდება. ეს არის კორექტირება ლარის კურსის იმ დევალვაციასთან მიმართებაში, რაც ჩვენს მეზობელ ქვეყნებში განხორციელდა. საქართველოში ბევრ ადამიანს აქვს სესხები დოლარში და მათვის ამ ციფრების მოსმენა ძნელია. თუ გადავხედავთ, ჩვენს მეზობელ ქვეყნებშიც ეროვნული ვალუტა დოლართან მიმართებაში გაუფასურდა. მანათი გაუფასურდა აზერბაიჯანში, ასევე ეროვნული ვალუტები გაუფასურდა ყაზახეთში, უკრაინაში, თურქეთში და მოლდავეთში. მოგეხსენებათ, ამის მიზეზი ძნელი ასახსენლი არ არის. მნიშვნელოვანი გაიაფებაა ნავთობზე, რამაც რიგ ქვეყნებში რყევები გამოიწვია. ამას ვერ ავცდით ჩვენც“, - აღნიშნა ებანოიძემ.