საქართველოს მთავარი პროკურორი ირაკლი შოთაძე საქართველოში თურქეთის რესპუბლიკის საგანგებო და სრულუფლებიან ელჩს მის აღმატებულება ზექი ლევენთ გუმრუქჩუს შეხვდა. შეხვედრას ასევე ესწრებოდნენ მთავარი პროკურორის მოადგილე გიორგი გოგაძე, სამართლებრივი უზრუნველყოფის დეპარტამენტის უფროსი ირაკლი ჩილინგარაშვილი და საქართველოში თურქეთის რესპუბლიკის საელჩოს მეორე მდივანი აჰმეთ სონერ ენსაროღლუ.

თურქეთის რესპუბლიკის ელჩმა ირაკლი შოთაძეს მთავარი პროკურორის თანამდებობაზე არჩევა მიულოცა და მომავალში თანამშრომლობის კიდევ უფრო გაღრმავების იმედი გამოთქვა. თავის მხრივ, მთავარმა პროკურორმა მადლობა გადაუხადა ელჩს 2015 წლის დეკემბერში საქართველოს პროკურატურის დელეგაციის თურქეთის რესპუბლიკაში ვიზიტის მაღალ დონეზე ორგანიზებისათვის და გამოხატა მზადყოფნა მისი თურქი კოლეგის საქართველოში ოფიციალურ მოწვევასთან დაკავშირებით. შეხვედრაზე მხარეები ასევე შეთანხმდნენ მომავალში შესაბამის უწყებებს შორის თანამშრომლობის გაღრმავებაზე ისეთ საკითხებთან დაკავშირებით, როგორებიცაა ტერორიზმისა და ტრანსნაციონალური დანაშაულის წინააღმდეგ ბრძოლა, ძებნილი პირების ექსტრადიცია და სამართლებრივი დახმარება, ასევე ერთობლივი ტრენინგებისა და სასწავლო სემინარების ორგანიზება.