ეროვნული ბანკის საბჭოს წევრობის შესაძლო კანდიდატები

პოლიტიკა - 10:38, 21 Jan, 2016

2332

მედია საქართველოს ეროვნული ბანკის საბჭოს წევრობის კანდიდატის ვინაობის დადგენას ცდილობს.

ამ დრომდე მათ შესახებ ოფიციალური ინფორმაცია არ ვრცელდება, თუმცა კულუარებში სამ კანდიდატზე აქტიურად საუბრობენ.

ესენი არიან: გიორგი ბაქრაძე, რომელიც ეროვნული ბანკის მოქმედი თანამშრომელია, ნია შარაშიძე, რომელიც ამ დროისთვის საერთაშორისო სავალუტო ფონდში მუშაობს და არჩილ იაკობაშვილი პროფესიით ფინანსისტი და სოცირებული პროფესორი.

ეროვნული ბანკის პრეზიდენტს, გიორგი ქადაგიძეს ვადა 2016 წლის თებერვალში ეწურება. ახალი პრეზიდენტი საბჭოს წევრებიდან აირჩევა.

საქართველოს პრეზიდენტის ადმინისტრაციაში ეროვნული ბანკის საბჭოს წევრობის კანდიდატის წარდგენის ბოლო ვადად 27 იანვარი განისაზღვრა.

ამ შეთანხმებას დარგის ექსპეტრებმა და არასამთავრობო ორგანიზაციების წარმომადგენლებმა პრეზიდენტის ადმინისტრაციის უფროსთან გიორგი აბაშიშვილთან შეხვედრაზე მიაღწიეს, რომელიც პრეზიდენტის სასახლეში დღეს გაიმართა.

შეთანხმების შესაბამისად, პრეზიდენტის ადმინისტრაციაში არასამთავრობო სექტორსა და ექსპერტებს კანდიდატურის წარდგენის ვადა 27 იანვრამდე აქვთ. 27 იანვარს ექსპერტებს გადაეგზავნებათ კონკრეტული კანდიდატურები და ამ დღიდანვე დაიწყება შეფასების პროცედურა და როგორც გიორგი აბაშიშვილი ვარაუდობს, პირველი ეტაპი ამ ნაწილში სწრაფად დასრულდება.

ამის შემდეგ, ექსპერტების მიერ დასახელებულ კანდიდატებს პრეზიდენტი განიხილავს, შეარჩევს და პარლამენტს წარუდგენს.

„სხვა საკითხებთან ერთად დღევანდელ შეხვედრაზე ჩამოვყალიბდით, კანდიდატურის შერჩევის კრიტერიუმებზე - ეს არის განათლება, პროფესიული გამოცდილება და პოლიტიკური მიუკერძოებლობა, რომელიც ეროვნული ბანკის დამოუკიდებლობისათვის განსაკუთრებით მნიშვნელოვანია“ - აღნიშნა გიორგი აბაშიშვილმა.