"კითხვების გასაქრობად ხდება იმ ადამიანის შერჩევა, ვისი სახელიც შავი ლაქებითაა გასვრილი"- ნიკოლეიშვილი კუჭავას საქმეზე

პოლიტიკა - 13:38, 20 Jan, 2016

2387

ექსპერტი მაია ნიკოლეიშვილი გაზეთ „ვერსიასთან“ ექსკლუზიურ ინტერვიუში სამეგრელო-ზემო სვანეთის ოლქის უფროსი პროკურორის ვახტანგ ქირიას მკვლელობაში ბრალდებული ბიძინა კუჭავას გარდაცვალების ამბავს ეხმაურება და გვამის დათვალიერების პირველად შედეგებზე საუბრობს. ნიკოლეიშვილის თქმით გამოძიებას ყველა ვერსია უნდა ქონდეს ჩამოწერილი, მხოლოდ ერთ ვერსიაზე არ უნდა მუშაობდეს და ტელევიზიით წინასწარ დასკვნებს არ უნდა დებდეს, რადგან ეს აჩენს ეჭვს, რომ ადამიანი, რომლის სახელსაც არასასიამოვნო ამბები და წარსულში შავი ლაქები უკავშირდება, ამა თუ იმ საქმეში კითხვის ნიშნების გასაქრობად გამოიყენონ:

„ცნობილია, რომ ქირია-კუჭავას შორის ნათესაური კავშირი იყო, თუ არ ვცდები, ისინი დეიდაშვილები იყვნენ, ერთმანეთში მიმოსვლაც ჰქონდათ ოჯახებით და ქირიას ოჯახმა კუჭავას ახალი წელიც მიულოცა. თავად ქირიას საკმაოდ დადებითად ახასიათებენ. ერთ რამეს გეტყვით ჩემი ცხოვრებისეული და პროფესიული გამოცდილებიდან გამომდინარე - შესაძლოა, ადამიანი, რომლის სახელსაც არასასიამოვნო ამბები და წარსულში შავი ლაქები უკავშირდება, ამა თუ იმ საქმეში კითხვის ნიშნების გასაქრობად გამოიყენონ. ეს ჩვეულებრივი სქემაა. ასე ხდება იმ ადამიანების შერჩევა, ვისი სახელიც შავი ლაქებითაა გასვრილი. ამიტომ არავითარი ერთი ვერსია - გამოძიებას ყველა ვერსია უნდა ჰქონდეს ჩამოწერილი. არავინ მინდა იფიქროს, რომ, რადგან ამ საქმეში ვარ ჩართული, მიანცდამაინც კუჭავას ინტერესებს ვიცავ. ასე არ არის - ბიძინა კუჭავას მეუღლეს პირდაპირ ვუთხარი, ყველაფერს ვიტყვი ისე, როგორც არის და ეს შეიძლება თქვენ არც გაწყობდეთ-მეთქი. მათ არავითარი პრეტენზია არ ჰქონიათ.“- აცხადებს ნიკოლეიშვილი