"პირველი, რაც გამახსენდა, ვანო მერაბიშვილი იყო"- ნიკოლეიშვილი არჩილ თალაკვაძეს აკრიტიკებს

პოლიტიკა - 13:34, 20 Jan, 2016

1632

სამეგრელო-ზემო სვანეთის ოლქის უფროსი პროკურორის, ვახტანგ ქირიასა და მედიამაგნატ, "საქართველოს ხმის" დამფუძნებლისა და დირექტორის, ბიძინა კუჭავას გარდაცვალების ამბავს ექსპერტი მაია ნიკოლეიშვილი გაზეთ „ვერსიასთან“ ექსკლუზიურ ინტერვიუში ეხმაურება. ექსპერტი მაია ნიკოლეიშვილი, რომელსაც ალტერნატიული ექსპერტიზის ჩატარება თავად კუჭავას ოჯახმა სთხოვა. გამოძიების დასრულებამდე ადამიანისთვის მკვლელისა და თვითმკვლელის წოდებას მიუღებლად მიიჩნევს და ამ ქმედების გამო შსს-ს მაღალჩინოსანს არჩილ თალაკვაძეს აკრიტიკებს. ნიკოლეიშვილი პარალელებს ეროსი კიწმარიშვილის თვითმკვლელობასა და ზურაბ ჟვანიას გაზით გაგუდვის საქმეებს შორისაც ავლებს და შიშობს, რომ შესაძლოა, საქმე უახლოეს მომავალში, ყოველგვარი საექსპერტო დასკვნებისა და კონკრეტული შედეგების გარეშე დაიხუროს:

„დაუშვებელია, წინასწარ რაიმე ვერსიაზე საუბარი. როცა ამ ვერსიას ვისმენდი, პირველი, რაც გამახსენდა, ვანო მერაბიშვილი იყო, რომელმაც ჟვანიას მკვლელობის მეორე დილას გამოგვიცხადა, ზურაბ ჟვანია CO-თი გაიგუდაო. არც ექსპერტიზა ჩატარებულა, არც არაფერი დადასტურებულა და უკვე აპრიორი ვამბობთ სიკვდილის მიზეზს? პირველი ეჭვი სწორედ აქედან გაჩნდა. გამოძიების დასრულება გამოძიების დაწყებისთანავე ყოვლად დაუშვებელია! გული მტკივა, რომ დღესაც ასე მოხდა და ეს მინიმუმ, დიდი არაპროფესიონალიზმია. გარდა ამისა, არსებობს ეთიკური ნორმები, ოჯახის წევრები, საზოგადოება და ასეთი ჰიჩკოკისეული განცხადებები ფეხების დაჭრაზე, გვამის სისხლისგან დაწრეტაზე და ა. შ. ხალხს თრგუნავს. შერლოკ ჰოლმსის დედუქციური უნარებით ჩენც აღფრთოვანებული ვართ, მაგრამ უკაცრავად, 21-ე საუკუნეში ვცხოვრობთ და დედუქცია კი არ გვჭირდება, იმისთვის ვიბრძვით, ქვეყანაში მტკიცებულობითი სამართალი დავამკვიდროთ. თორემ ღმერთმა დამიფაროს, რომელიმე მკვლელის ხელისდამფარებელი ან თანამგრძნობი ვიყო. თანაც, ხომ არსებობს გამოძიებისა და დაცვის ინტერესები - ექსპერტები და ადვოკატები მეტნაკლებად თავს იკავებენ და თუ ყველამ ყველაფერი ილაპარაკა, ასე ჭეშმარიტებას როგორ დავადგენთ? მით უმეტეს, სასამართლო გამოძიებამდე ჯერ საქმე არ მისულა და არც ერთი ექსპერტის დასკვნა არ არსებობს.»- განაცხადა მაია ნიკოლეიშვილმა.