თბილისისი მერიის ყოფილი თანამშრომლები, რომლებიც წინასაახალწლოდ სამსახურიდან გაათავისუფლეს, სასამართლოში სარჩელის შეტანას აპირებენ.

როგორც მათ დღეს გამართულ პრესკონფერენციაზე განაცხადეს, გაშვების მოტივი პოლიტიკურია.

როგორც ისინი ამბობენ, 120 ადამიანი მერიიდან ახსნა-განმარტების გარეშე გათავისუფლდა.

„ვარდების მოედანზე ვიყავით გაყვანილი ახალი წლის ღონისძიებაზე და იქ მითხრეს, რომ ხელშეკრულება აღარ გამიგრძელდებოდა. ავედი განყოფილების უფოსთან და სამსახურიდან გათავისუფლების მიზეზი ვიკითხე. მითხრეს, რომ ამ გადაწყვეტილებას ისინი არ იღებდნენ“, - ამბობს მერიის ყოფილი თანამშრომელი სერგო ბიჭიაშვილი.

გათავისუფლებული თანამშრომლების ინტერესებს არასამთავრობო ორგანიზაცია „მედიატორი“ დაიცავს.

„მერიაში მუშაობენ აბსოლუტური უცოდინრები. წარმოდგენა არ აქვთ არც შრომის კოდექსზე, არც ადამიანის უფლებებზე. ჩვენ იურისტებთან კონსულტაციების შედეგად გავარკვიეთ, რომ თუ ადამიანი 3 წელზე მეტი მუშაობს ხელშეკრულებით, მისი ხელშეკრულება უვადოდ ითვლება და მათი გათავისუფლება მიზეზის გარეშე გამორიცხულია. მერიამ მაინც გაათავისუფლა ეს ადამიანები. სწორედ მათ უფლებებს დავიცავთ ჩვენ“, - ამბობს ორგანიზაციის დამფუძვნებელი გივი კუბლაშვილი.